വരാപ്പുഴ: പോലീസ് കസ്റ്റഡിയില്‍ മരിച്ച ശ്രീജിത്ത് തന്‍റെ അച്ഛനെ മര്‍ദ്ദിച്ചവരുടെ കൂട്ടത്തില്‍ ഉണ്ടായിരുന്നില്ലെന്ന് വാസുദേവന്‍റെ മകന്‍ വിനീഷ്. പോലീസിന് ആളുമാറിയതാണ്. മറ്റൊരു ശ്രീജിത്തിനെക്കുറിച്ചാണ് പോലീസിനോട് പറഞ്ഞിരുന്നത്. വിനീഷ് പറഞ്ഞു. പരാതിയില്‍ പറഞ്ഞ ആളുകളെയൊന്നും പൊലീസ് അറസ്റ്റ് ചെയ്തിട്ടില്ലെന്നും അതിനിടെയാണ് സംഭവമുണ്ടായതെന്നും വിനീഷ് വ്യക്തമാക്കി.
വീടാക്രമണത്തെത്തുടര്‍ന്നു വാസുദേവന്‍ ജീവനൊടുക്കിയ സംഭവത്തിലാണ് ശ്രീജിത്തിനെ പോലീസ് കസ്റ്റഡിയില്‍ എടുത്തത്. കസ്റ്റഡിയില്‍ വച്ചു ദേഹാസ്വാസ്ഥ്യം അനുഭവപ്പെട്ട ശ്രീജിത്തിനെ ആശുപത്രിയില്‍ പ്രവേശിപ്പിച്ചിരുന്നു. ശ്രീജിത്തിന്‍റെ ആരോഗ്യനില വഷളായതിനെത്തുടര്‍ന്ന് തിങ്കളാഴ്ച പുലര്‍ച്ചെ ചേരാനല്ലൂരിലെ സ്വകാര്യ ആശുപത്രിയിലെത്തിച്ച്‌ അടിയന്തര ശസ്ത്രക്രിയ നടത്തിയെങ്കിലും ജീവന്‍ രക്ഷിക്കാനായില്ല.
അതേസമയം ചെറുകുടലിനേറ്റ ചവിട്ട് മൂലമാണ് ശ്രീജിത്ത് മരിച്ചതെന്ന് ചികിത്സാ രേഖയില്‍ പറയുന്നു. അടിവയറ്റില്‍ കടുത്ത ആഘാതമേറ്റിരുന്നു. ഇത് ആരോഗ്യനില വഷളാക്കി. ചെറുകുടലില്‍ നീളത്തില്‍ മുറിവുണ്ടായിരുന്നു എന്നാണ് എറണാകുളത്തെ ആശുപത്രിയിലെ ചികിത്സാ രേഖകള്‍ വ്യക്തമാക്കുന്നത്.
