ന്യൂഡല്‍ഹി: ഇ-കൊമേഴ്സ് വെബ്സൈറ്റുകളില്‍ ഉല്‍പ്പന്നങ്ങളെ പ്രകീര്‍ത്തിച്ച്‌ പണം നല്‍കി റിവ്യൂ എഴുതിക്കുന്നതിന് (Reward Based Reviews) നിയന്ത്രണമേര്‍പ്പെടുത്താന്‍ കേന്ദ്ര സര്‍ക്കാര്‍.
ഇതുസംബന്ധിച്ച്‌ ബ്യൂറോ ഓഫ് ഇന്ത്യന്‍ സ്റ്റാന്‍ഡേര്‍ഡ് (ബി.ഐ.എസ്) കരട് മാര്‍ഗരേഖ പുറത്തിറക്കി.
പണം നല്‍കിയോ, സൗജന്യമായി ഉല്‍പ്പന്നങ്ങള്‍ നല്‍കിയോ എഴുതിപ്പിക്കുന്ന റിവ്യൂകളെ പ്രത്യേകം അടയാളപ്പെടുത്തണമെന്നാണ് ഓണ്‍ലൈന്‍ വാണിജ്യ സൈറ്റുകള്‍ക്ക് നല്‍കിയിരിക്കുന്ന ഒരു നിര്‍ദേശം. സാധാരണ റിവ്യൂ അല്ലെന്ന് ഉപഭോക്താവിന് പെട്ടെന്ന് തിരിച്ചറിയാന്‍ സാധിക്കണം.
ഇതുകൂടാതെ, മൊത്തത്തിലുള്ള റേറ്റിങ് സംഖ്യ നല്‍കുമ്ബോള്‍ ഇത്തരം പെയ്ഡ് റേറ്റിങ്ങുകള്‍ പരിഗണിക്കരുത്. അതായത്, സാധാരണ ഉപയോക്താക്കളുടെ റേറ്റിങ് മാത്രമേ ഉല്‍പ്പന്നത്തിന്‍റെ മൊത്തത്തിലുള്ള റേറ്റിങ്ങിന് വേണ്ടി പരിഗണിക്കാവൂ. റിവാര്‍ഡ് റിവ്യൂകള്‍ക്കായി വേണമെങ്കില്‍ പ്രത്യേകമായി മറ്റൊരു ആകെ റേറ്റിങ് നല്‍കാം.
ഓണ്‍ലൈന്‍ റിവ്യൂകള്‍ ഒരു ഉല്‍പ്പന്നത്തിലേക്ക് ആളുകളെ ആകര്‍ഷിക്കുന്ന പ്രധാന ഘടകമാണ്. എന്നാല്‍, പെയ്ഡ് റിവ്യൂകളും റിവാര്‍ഡ് റിവ്യൂകളും ഉല്‍പ്പന്നത്തിന്‍റെ റിവ്യൂ കൃത്രിമമായി വര്‍ധിപ്പിക്കുന്നുണ്ട്. ഇത് തടയാനുള്ള നീക്കമാണ് അധികൃതരുടെ ഭാഗത്തുനിന്നുണ്ടായിരിക്കുന്നത്.
ഓണ്‍ലൈന്‍ വാണിജ്യ സൈറ്റുകള്‍ക്ക് കരട് നിര്‍ദേശത്തില്‍ അഭിപ്രായങ്ങള്‍ അറിയിക്കാന്‍ നവംബര്‍ 10 വരെ സമയം നല്‍കിയിട്ടുണ്ട്.
ബ്രാന്‍ഡുകള്‍ പുതിയ ഉല്‍പ്പന്നങ്ങള്‍ അവതരിപ്പിക്കുമ്ബോള്‍, അവ സൗജന്യമായി നല്‍കിയോ പ്രതിഫലം നല്‍കിയോ ഇ-കൊമേഴ്സ് ഇടങ്ങളിലും സോഷ്യല്‍ മീഡിയ അടക്കമുള്ള പ്ലാറ്റ്‌ഫോമുകളിലും റിവ്യൂ എഴുതിക്കുകയാണ് പതിവ്. ഇത് ഉല്‍പ്പന്നത്തിന്‍റെ സ്വീകാര്യതക്ക് വലിയ ഘടകമാകാറുണ്ട്.
