തിരുവനന്തപുരം: ആര്യനാട് പോലീസ് സ്റ്റേഷനില്‍ വനിതാ പോലീസുകാര്‍ തമ്മില്‍ വാക്കുതര്‍ക്കം. ഒളിച്ചോട്ട സംഭവത്തിലെ കക്ഷികളെ കോടതിയില്‍ കൊണ്ടുപോകാനുള്ള തയ്യാറെടുപ്പുകള്‍ക്കിടയിലായിരുന്നു സംഭവം.സ്‌റ്റേഷനിലുണ്ടായിരുന്ന നാട്ടുകാരില്‍ ചിലര്‍ ചിത്രീകരിച്ച ദൃശ്യങ്ങളാണ് പുറത്തുവന്നത്.
വനിതാ എസ്.ഐയുടെ മുന്നില്‍വെച്ചാണ് പൊലീസുകാര്‍ തമ്മില്‍ കടുത്ത തര്‍ക്കമുണ്ടായത്. തിങ്കളാഴ്ച വൈകിട്ടാണ് സംഭവം നടന്നത്. ആര്യനാട് സ്റ്റേഷന്‍ പരിധിയില്‍ ഒരു വിവാഹിതന്‍ പതിനെട്ട് വയസ്സുകാരിയുമായി നാടുവിട്ടിരുന്നു. പരാതിയുടെ അടിസ്ഥാനത്തില്‍ ഇരുവരേയും പോലീസ് കണ്ടെത്തി. ഇവരെ കോടതിയില്‍ ഹാജരാക്കാന്‍ എസ്.ഐ വനിതാ പോലീസുകാരില്‍ ഒരാളോട് നിര്‍ദേശിച്ചു.
ഈ ജോലി ചെയ്യുന്നതുമായി ബന്ധപ്പെട്ടായിരുന്നു ഇരുവരു തമ്മില്‍ തര്‍ക്കമുണ്ടായത്.നാട്ടുകാരടക്കം നോക്കിനില്‍ക്കെയായിരുന്നു സംഭവം. നാട്ടുകാരില്‍ ആരോ എടുത്ത വിഡിയോ ആണ് ഇപ്പോള്‍ പ്രചരിക്കുന്നത്.
ആരാണ് സീനിയര്‍, ജൂനിയര്‍ എന്നത് സംബന്ധിച്ച്‌ ഇവര്‍ തമ്മില്‍ നേരത്തെ തര്‍ക്കമുണ്ടായിരുന്നു. ഇതാണ് കടുത്ത വാക്കു തര്‍ക്കത്തിലേക്ക് കടന്നത്. ഇതുസംബന്ധിച്ച്‌ സ്‌പെഷ്യല്‍ ബ്രാഞ്ച് അന്വേഷണം ആരംഭിച്ചിട്ടുണ്ട്.
