തലശേരി: പിണറായിയില് ഒരു കുടുംബത്തിലെ നാല് പേര് ദുരൂഹ സാഹചര്യത്തില് മരിച്ച സംഭവത്തില് എട്ട് വയസ്സുകാരിയുടെ മൃതദേഹം പുറത്തെടുത്ത് പോസ്റ്റുമോര്ട്ടം നടത്തുന്നു. പടന്നക്കരയിലെ സൗമ്യയുടെ മകള് ഐശ്വര്യ കിഷോറിന്റെ മൃതദേഹമാണ് ഇപ്പോള് പരിശോധിക്കുന്നത്.
ജനുവരി 21 നാണ് ഛര്ദിയെത്തുടര്ന്ന് കോഴിക്കോട് ബേബി മെമ്മോറിയല് ആശുപത്രിയില്വച്ച് ഐശ്വര്യ മരണമടഞ്ഞത്. നാല് മാസത്തിനിടെ ഈ കുടുംബത്തില് നടന്നത് മൂന്ന് മരണങ്ങളാണ്. മാര്ച്ച് ഏഴിന് സൗമ്യയുടെ അമ്മ കമലയും ഏപ്രില് 13ന് അച്ഛന് കുഞ്ഞിക്കണ്ണനും മരിച്ചിരുന്നു. 2012ല് സൗമ്യയുടെ ഒരു വയസ്സുള്ള മകള് കീര്ത്തനയും മരിച്ചിരുന്നു. വയറിലുണ്ടായ അസ്വസ്ഥതയും ഛര്ദിയും കാരണമാണ് നാലുപേരും മരിച്ചത്.
സംഭവത്തില് ഐശ്വര്യയുടെ ബന്ധുവായ വണ്ണത്താന് വീട്ടില് പ്രജീഷിന്റെ പരാതി പ്രകാരമാണ് പോലീസ് കേസെടുത്ത് അന്വേഷണം ആരംഭിച്ചത്. നാല് പേരെയും നാല് ആശുപത്രികളിലാണ് ചികിത്സിച്ചത്. നാല് ആശുപത്രികളിലേയും ചികിത്സാ രേഖകള് അന്വേഷണ സംഘം ശേഖരിച്ചിട്ടുണ്ട്. ഛര്ദ്ദിയും വയറു വേദനയുമായിട്ടാണ് നാല് പേരും ചികിത്സ തേടിയിരുന്നത്. നാല് പേരും ആശുപത്രിയില് എത്തി ചികിത്സ തുടങ്ങി പരിശോധനകള് പൂര്ത്തിയാക്കി ആരോഗ്യ സ്ഥിതി വീണ്ടെടുത്ത ശേഷം പെട്ടെന്ന് മരണപ്പെടുകയാണുണ്ടായിട്ടുള്ളത്.
