കൊല്ലം: ഓച്ചിറയില് 13 വയസുകാരിയെ തട്ടിക്കൊണ്ട് പോയ സംഭവത്തില് മകനെ സംരക്ഷിക്കില്ലെന്ന് സിപിഐ ബ്രാഞ്ച് സെക്രട്ടറി നവാസ്. മകന് റോഷന് കുറ്റക്കാരാനാണെങ്കില് ശിക്ഷിക്കണം. എന്നാല് ചിലര് ഇതിന്റെ പേരില് രാഷ്ട്രീയ മുതലെടുപ്പിന് ശ്രമിക്കുന്നെന്നും തെറ്റു ചെയ്തവര്ക്കൊപ്പം നില്ക്കില്ലെന്നും അദ്ദേഹം വ്യക്തമാക്കി.
ഓച്ചിറ സ്വദേശി റോഷനും സംഘവുമാണ് പതിമൂന്ന് വയസ്സുള്ള പെണ്കുട്ടിയെ തട്ടിക്കൊണ്ടുപോയതെന്നാണ് പൊലീസ് പറയുന്നത്. ഓച്ചിറയില് നിന്നും തട്ടിക്കൊണ്ട് പോയ രാജസ്ഥാന് സ്വദേശികളുടെ മകളായ പതിമൂന്നുകാരിയുമായി പ്രതി ബെംഗളൂരുവിലേക്ക് കടന്നുവെന്ന് പൊലീസ് അറിയിച്ചിരുന്നു. കൂട്ടുപ്രതികള് എറണാകുളം റെയില്വേ സ്റ്റേഷന് വരെ അനുഗമിച്ചുവെന്നും പൊലീസ് പറഞ്ഞു. പ്രതി ബാംഗ്ലൂരിലേക്കുള്ള ട്രെയിന് ടിക്കറ്റെടുത്തതിനുള്ള തെളിവ് പൊലീസിന് ലഭിച്ചിട്ടുണ്ട്.
വഴിയോരക്കച്ചവടക്കാരാണ് പെണ്കുട്ടിയുടെ മാതാപിതാക്കള്. ഓച്ചിറ – വലിയകുളങ്ങര പ്രദേശത്ത് ഒരു മാസമായി ഇവര് വഴിയോരക്കച്ചവടം നടത്തിവരികയാണ്. പ്ലാസ്റ്റര് ഓഫ് പാരീസ് ഉപയോഗിച്ച് വിഗ്രഹങ്ങള് ഉണ്ടാക്കി വില്ക്കുന്ന കുടുംബമാണിത്. ഇന്നലെ രാത്രി 11 മണിക്ക് ഒരു സംഘമാളുകള് ഇവര് താമസിക്കുന്ന ഷെഡ്ഡില് അതിക്രമിച്ച് കയറി പെണ്കുട്ടിയെ പിടിച്ചു കൊണ്ടുപോകാന് ശ്രമിച്ചു.
തടയാന് ശ്രമിച്ചപ്പോള് അച്ഛനമ്മമാരെ മര്ദ്ദിച്ച് അവശരാക്കി വഴിയില്ത്തള്ളിയ ശേഷം പെണ്കുട്ടിയെ തട്ടിക്കൊണ്ടുപോവുകയായിരുന്നു. പ്രതികള് സഞ്ചരിച്ചിരുന്ന കാര് ഇന്നലെ രാത്രി ഉപേക്ഷിച്ച നിലയില് കണ്ടെത്തിയിരുന്നു. കായംകുളത്ത് നിന്നാണ് അക്രമികള് സഞ്ചരിച്ച കാര് ഉപേക്ഷിച്ച നിലയില് കണ്ടെത്തിയത്.