കോട്ടയം: കെവിന്റെത് മുങ്ങി മരണം തന്നെയെന്ന് മെഡിക്കല് ബോര്ഡ് റിപ്പോര്ട്ട്. മെഡിക്കല് ബോര്ഡിന്റെ പ്രാഥമിക വിലയിരുത്തല് അടങ്ങിയ റിപ്പോര്ട്ട് ഐ.ജിക്ക് സമര്പ്പിച്ചു. അന്തിമ റിപ്പോര്ട്ട് തയാറാക്കുന്നതിന് മുമ്പ് സംഘം തെന്മലയില് കെവിന് മുങ്ങി മരിച്ച ഭാഗത്ത് പരിശോധന നടത്തും.
കെവിന്റെത് മുങ്ങിമരണമാണെന്നായിരുന്നു പോസ്റ്റ്മോര്ട്ടം റിപ്പോര്ട്ട്. തുടര്ന്ന് വിദഗ്ദാഭിപ്രായം വേണമെന്ന് അന്വേഷണസംഘം ആവശ്യപ്പെട്ടതനുസരിച്ചാണ് മെഡിക്കല് ബോര്ഡ് രൂപീകരിച്ചത്. മെഡിക്കല് ബോര്ഡിന്റെയും പ്രാഥമിക നിഗമനം മുങ്ങിമരണമാണെന്നാണ്.
എന്നാല് കെവിന്റെ ശരീരത്തിന്റെ ഇരുഭാഗത്തും പോറലേറ്റതിന്റെ പാടുകളുണ്ടെന്നും ഇത് എങ്ങനെ സംഭവിച്ചുവെന്നറിയാന് സ്ഥലം സന്ദര്ശിക്കണമെന്നും സംഘം അറിയിച്ചു. അതിനുശേഷം മാത്രമേ അന്തിമ നിഗമനത്തിലെത്താനാകൂവെന്നും മെഡിക്കല് ബോര്ഡ് വ്യക്തമാക്കി.