കണ്ണൂര്: വോട്ടെടുപ്പിനിടെ ഉണ്ടായ സംഘര്ഷത്തെ തുടര്ന്ന് കണ്ണൂരില് മുസ്ലിം ലീഗ് പ്രവര്ത്തകനെ വെട്ടിക്കൊന്ന കേസില് ഒരാള് പിടിയില്. സംഭവവുമായി ബന്ധപ്പെട്ട് സി.പി.എം പ്രവര്ത്തകന് ഷിനോസിനെ ആണ് പൊലീസ് അറസ്റ്റു ചെയ്തത്. കൊല്ലപ്പെട്ട മന്സൂറിന്റെ അയല്വാസിയാണ് പിടിയിലായ ഷിനോസ്.
പുല്ലൂക്കര പാറാല് മന്സൂര്(22) ആണ് കൊല്ലപ്പെട്ടത്. സഹോദരന് മുഹ്സിന് പരിക്കേറ്റു. കൊലപാതകത്തിന് പിറകില് സിപിഎം ആണെന്ന് ലീഗ് ആരോപിച്ചു.
വോട്ടെടുപ്പ് ദിവസമായ ഇന്നലെ രാവിലെ മുതല് പ്രദേശത്ത് ചെറിയ രീതിയിലുളള സംഘര്ഷം ആരംഭിച്ചിരുന്നു. ഉച്ചയ്ക്ക് പന്ത്രണ്ടരയോടെ സംഘര്ഷം രൂക്ഷമായി. 149-150 എന്നീ രണ്ടുബൂത്തുകള്ക്കിടയിലായിരുന്നു പ്രശ്നം. 149-ാം നമ്ബര് ബൂത്തിലേക്ക് ഓപ്പണ് വോട്ട് ചെയ്യുന്നതിനായി വോട്ടര്മാരെ കൊണ്ടുവരുന്നതുമായി ബന്ധപ്പെട്ടായിരുന്നു തര്ക്കം.
രാത്രി ഏഴരയോടെ വീണ്ടും സംഘര്ഷമുണ്ടാവുകയായിരുന്നു. രാത്രിയോടെ ഒളിച്ചിരുന്ന ഒരുസംഘം ആളുകള് മന്സൂര് വീട്ടില് നിന്ന് പുറത്തിറങ്ങുന്ന സമയം നോക്കി ബോംബ് എറിയുകയും തുടര്ന്ന് വെട്ടി പരിക്കേല്പ്പിക്കുകയുമായിരുന്നു.
ഗുരുതരമായി പരിക്കേറ്റ മന്സൂറിനേയും സഹോദരനേയും ആദ്യം തലശ്ശേരി ഇന്ദിരാഗാന്ധി ആശുപത്രിയിലാണ് പ്രവേശിപ്പിച്ചത്. പിന്നീട് കോഴിക്കോട്ടുളള സ്വകാര്യ ആശുപത്രിയിലേക്ക് മാറ്റി. രാത്രി ഒരു മണിയോടെ മരണം സംഭവിക്കുകയായിരുന്നു.
അക്രമി സംഘത്തെ തടയാന് ശ്രമിച്ച മുഹ്സിന്്റെ മാതാവിനും അയല്പക്കത്തുള്ള സ്ത്രീക്കും പരിക്കുണ്ട്.
മന്സൂറിന്റെ കൊലപാതകത്തില് പ്രതിഷേധിച്ച് കൂത്തുപറമ്ബ് നിയോജക മണ്ഡലത്തില് ഇന്ന് യു.ഡി.എഫ്. ഹര്ത്താലിന് ആഹ്വാനം ചെയ്തു