തിരുവനന്തപുരം: തലയ്ക്ക് വെളിവുള്ള ആരും കോണ്ഗ്രസിനൊപ്പം പോകില്ലെന്ന് സിപിഐ സംസ്ഥാന സെക്രട്ടറി കാനം രാജേന്ദ്രന്. സി.പിഐയെ കോണ്ഗ്രസിലേക്ക് ക്ഷണിച്ച മുന് മന്ത്രി തിരുവഞ്ചൂര് രാധാകൃഷ്ണന്റെ ക്ഷണത്തെ വിമര്ശിച്ച് സംസാരിക്കുകയായിരുന്നു അദ്ദേഹം.
കോണ്ഗ്രസുമായി സഖ്യമെന്ന തരത്തിലുള്ള വാര്ത്തകള് സത്യമല്ല. 2018 ഏപ്രില് 25 മുതല് 29 വരെ കൊല്ലത്ത് പാര്ട്ടി കോണ്ഗ്രസ് നടക്കും. അതിനുവേണ്ട രാഷ്ട്രീയ പ്രമേയത്തിന് രൂപം നല്കുന്നത് ജനുവരി എട്ട്, ഒമ്പത്, പത്ത് തിയതികളില് വിജയവാഡയില് ചേരുന്ന പാര്ട്ടിയുടെ നാഷണല് എക്സിക്യൂട്ടീവും നാഷണല് കൗണ്സിലുമാണ്. അങ്ങനെ ഒരു രേഖ ഞങ്ങള് തയ്യാറാക്കിയാല് ഒരു നിമിഷം പോലും വൈകാതെ അത് ജനങ്ങള്ക്ക് മുന്നിലെത്തും. കാരണം അതൊരു പൊതു രേഖയാണ്. അപ്പോള് ഇത്തരം കാര്യങ്ങളൊക്കെ ചര്ച്ച ചെയ്യാമെന്നും കാനം പറഞ്ഞു.
ഇപ്പോള് പുറത്തുവന്നത് രാഷ്ട്രീയ പ്രമേയത്തിന്റെ കരട് മാത്രമാണ്. അത് പാര്ട്ടിയുടെ അഭിപ്രായമായി കണക്കാക്കാന് പറ്റില്ലെന്നും അദ്ദേഹം വ്യക്തമാക്കി.
