തിരുവനന്തപുരം: വാഹനമിടിച്ച് പരിക്കേറ്റ് റോഡില് വീണ വൃദ്ധയെ തിരിഞ്ഞ് നോക്കാതെ ജനങ്ങള്. തിരുവനന്തപുരം ജില്ലയിലെ തിരക്കേറിയ റോഡിലാണ് സംഭവമുണ്ടായത്. ഇതിന്റെ സി.സി.ടി.വി ദൃശ്യങ്ങള് പ്രചരിച്ചതോടെയാണ് ഞെട്ടിപ്പിക്കുന്ന സംഭവം പുറംലോകമറിഞ്ഞത്.
പരിക്കേറ്റ് റോഡിന് നടുവിലാണ് വൃദ്ധ കിടന്നിരുന്നത്. ഇവര്ക്കരികിലുടെ നിരവധി വാഹനങ്ങള് കടന്നുപോയെങ്കിലും ആരും വാഹനം നിര്ത്താനോ ഇവരെ സഹായിക്കാനോ തയാറായില്ല. ആ സമയത്ത് റോഡിലുടെ പോയ പൊലീസുകാരാണ് ഒടുവില് വൃദ്ധയെ ആശുപത്രിയില് എത്തിച്ചത്.
അപകടത്തെ കുറിച്ച് തങ്ങള് അറിഞ്ഞിരുന്നില്ലെന്നും അതുവഴി പോവുമ്പോള് ആള്ക്കൂട്ടം കണ്ട് വാഹനം നിര്ത്തി സംഭവത്തില് ഇടപെടുകയായിരുന്നുവെന്നും പൊലീസ് അറിയിച്ചു. മല്സ്യ വില്പനക്കാരിയായ വൃദ്ധ ഇപ്പോള് മെഡിക്കല് കോളജ് ആശുപത്രിയില് ചികില്സയിലാണ്.
വൃദ്ധയെ ഇടിച്ച സംഭവവുമായി ബന്ധപ്പെട്ട് 20കാരനെ അറസ്റ്റ് ചെയ്തതായും പൊലീസ് അറിയിച്ചു. മൂന്ന് പേരുമായി പോയ ബൈക്കാണ് വൃദ്ധയെ ഇടിച്ചതെന്നും ഇതില് സഞ്ചരിച്ച ആരും ഹെല്മറ്റ് ധരിച്ചിരുന്നില്ലെന്നും പൊലീസ് വ്യക്തമാക്കി.