ചെന്നൈ: സിവില് സര്വീസ് മെയിന് പരീക്ഷക്കിടെ ബ്ലൂ ടൂത്ത് ഉപയോഗിച്ച് കോപ്പി അടിക്കാന് ശ്രമിച്ച മലയാളി ഐ .പി.എസ് ട്രെയിനി ഓഫിസര് പി ടിയില്. തമിഴ്നാട് തിരുനല്വേലി നംഗുനേരി സബ്ഡിവിഷനിലെ എ.എസ്.പി എറണാകുളം സ്വദേശി സഫീര് കരീം ആണ് പിടിയിലായത്. ഇയാളെ കോപ്പിയടിക്കാന് സഹായിച്ച ഭാര്യ ജോയ്സിയെ ഹൈദരാബാദ് പൊലീസ് അറസ്റ്റ് ചെയ്തു. സര്വീസില് നിന്നും പുറത്താക്കുന്നതടക്കമുള്ള അച്ചടക്ക നടപടികള് കരീം നേരിടേണ്ടിവരും.
ചെന്നൈ നഗരത്തിലെ എഗ്മൂര് പ്രസിഡന്സി ഗേള്സ് ഹയര് സെക്കന്ഡറി സ്കൂളില് തിങ്കളാഴ്ച പരീക്ഷ എഴുതുന്നതിനിടെയാണ് കൃത്രിമം കാട്ടിയത്. ഒളിപ്പിച്ചുവെച്ച ബ്ലൂടൂത്ത് വഴി ഹൈദരാബാദിലുള്ള ഭാര്യയോട് മൊബൈല് ഫോണിലൂടെ ഉത്തരങ്ങള് ചോദിച്ച് എഴുതുകയായിരുന്നു. പരീക്ഷക്കിടെ സംശയം തോന്നിയ ഇന്വിജിലേറ്റര് സഫീറിനനെ ദേഹപരിശോധനയ്ക്ക് വിധേയനാക്കിയപ്പോഴാണ് സംഭവം പുറത്തറിയുന്നത്.
ഇയാള് കരിംസ് ലാ എക്സലന്സ് എന്ന പേരില് സിവില് സര്വീസ് കോച്ചിംഗ് സെന്റര് നടത്തുന്നുണ്ട്. തിരുവനന്തപുരം, കൊച്ചി, കോഴിക്കോട്, ഭോപ്പാല്, ഹൈദരാബാദ് എന്നിവിടങ്ങളില് സ്ഥാപനത്തിന് ബ്രാഞ്ചുകളുണ്ട്. ഐ.പി.എസ് റാങ്കിങ്ങില് ഒന്നാമനാണ് കരീമെന്നാണ് കോച്ചിംഗ് സെന്ററിന്റെ പരസ്യത്തില് പറയുന്നത്. എന്നാല് 2014ലെ സിവില്സര്വീസ് പരീക്ഷയില് 112-ാം റാങ്കാണ് ഇയാള്ക്ക് ലഭിച്ചത്.