കൊച്ചി: ചോറ്റാനിക്കരയില് അമ്മയും കാമുകനും നാലുവയസ്സുകാരിയായ മകളെ കൊന്ന കേസില് ഒന്നാം പ്രതി രഞ്ജിത്തിന് വധശിക്ഷ. രണ്ടാം പ്രതികളായ റാണിക്കും ബേസിലിനും ജീവപര്യന്തം തടവ് ശിക്ഷയും വിധിച്ചു. എറണാകുളം പോക്സോ കോടതിയാണ് ശിക്ഷ വിധിച്ചത്.
കഴിഞ്ഞ ദിവസം വിധി പ്രഖ്യാപനത്തിനു മുമ്പേ രഞ്ജിത്ത് ജയിലില് വച്ച് വിഷം കഴിച്ച് ആത്മഹത്യക്ക് ശ്രമിച്ചിരുന്നു. കോടതി പിന്നീട് വിധി പ്രഖ്യാപനം ഇന്നത്തേക്ക് മാറ്റി വയ്ക്കുകയായിരുന്നു.
2013 ഒക്ടോബര് 29നായിരുന്നു കേസിന് ആസ്പദമായ സംഭവം. അവിഹിത ബന്ധത്തിന് തടസ്സമാകുമെന്ന് കരുതിയാണ് കുട്ടിയെ കൊലപ്പെടുത്തിയത്. രഞ്ജിത്താണ് കുട്ടിയെ കൊലപ്പെടുത്തിയത്. പിറ്റേന്ന് കുട്ടിയെ കാണാനില്ലെന്നുപറഞ്ഞ് റാണി ചോറ്റാനിക്കര പൊലീസിലെത്തിയിരുന്നു. ഇവരുടെ മൊഴികളില് സംശയം തോന്നിയ പൊലീസ് വിശദമായി ചോദ്യംചെയ്തപ്പോഴാണ് കൊലപാതകത്തിന്റെ കാര്യം പുറത്തുവന്നത്.
സംഭവം നടക്കുമ്പോള് റാണിയുടെ ഭര്ത്താവായ വിനോദ് കഞ്ചാവുകേസില് ജയിലിലായിരുന്നു. റാണിക്ക് രഞ്ജിത്തുമായി വര്ഷങ്ങളായി അവിഹിത ബന്ധമുണ്ടായിരുന്നു. മറ്റൊരു കാമുകനായിരുന്ന ബേസില്, സഹോദരന് എന്ന വ്യാജേനയാണ് അമ്പാടിമലയിലെ വീട്ടില് റാണിക്കൊപ്പം കഴിഞ്ഞിരുന്നത്.
സംഭവ ദിവസം സ്കൂള്വിട്ട് വീട്ടിലേക്ക് കുട്ടി വരുമ്പോള് റാണിയും ബേസിലും സ്ഥലത്തില്ലായിരുന്നു. വീട്ടിലുണ്ടായിരുന്ന രഞ്ജിത്ത് കുട്ടിയെ ഉപദ്രവിക്കാന് ശ്രമിച്ചു. ഉച്ചത്തില് കരഞ്ഞപ്പോള് കുട്ടിയുടെ മുഖം പൊത്തിപ്പിടിച്ചു. ചെറുത്ത കുട്ടിയുടെ കഴുത്തില് കൈമുറിക്കിയ ശേഷം എടുത്ത് എറിഞ്ഞു. തലയുടെ പിന്വശം ഇടിച്ചാണ് കുട്ടി വീണത്.
തുടര്ന്ന് കുട്ടിയുടെ മൃതദേഹം ടെറസിന്റെ മുകളില് ഒളിപ്പിച്ചു. അപ്പോഴേക്കും ബേസിലും റാണിയും വീട്ടില് തിരികെയെത്തി. ആദ്യം തിരച്ചില് നടത്തിയെങ്കിലും പിന്നീട് യഥാര്ഥവിവരം രഞ്ജിത്ത് അറിയിച്ചു. എവിടെ മറവുചെയ്യണമെന്ന് റാണി തന്നെയാണ് നിര്ദേശിച്ചത്. രഞ്ജിത്തിന്റെ ആക്രമണത്തില് കുട്ടിയുടെ കൈയും വാരിയെല്ലും ഒടിയുകയും ജനനേന്ദ്രയത്തില് ആറു സെന്റീമീറ്ററോളം മുറിവുമുണ്ടായിരുന്നു.
