ചെന്നൈ: പ്രധാനമന്ത്രി നരേന്ദ്രമോദിക്ക് നേരെ ചെന്നൈ വിമാനത്താവളത്തില് കരിങ്കൊടി പ്രതിഷേധം. കാവേരി നദീജല പ്രക്ഷോഭത്തില് പങ്കെടുക്കുന്നവരാണ് പ്രധാനമന്ത്രിക്ക് നേരെ കരിങ്കൊടിയുമായി വിമാനത്താവളത്തിനു സമീപമുള്ള റോഡുകളില് അണിനിരന്നത്.
ചെന്നൈ വിമാനത്താവള റോഡിലും അണ്ണാ ശാലെ അപ്രോച്ച് റോഡുകളിലും കരിങ്കൊടികളും കറുത്ത ബലൂണുകളുമായി പ്രതിഷേധക്കാര് എത്തി. തുടര്ന്ന് പൊലീസെത്തി സംഘടനാ നേതാക്കള് ഉള്പ്പെടെ 200 ഒാളം പ്രതിഷേധക്കാരെ അറസ്റ്റു ചെയ്തു നീക്കി.
കവേരി നദീജല വിനിയോഗ ബോര്ഡ് നടപ്പാക്കണമെന്നാവശ്യപ്പെട്ട് ഡി.എം.കെ, തമിഴക വാഴ്വൊരുമെയ് കാച്ചി, കര്ഷക സംഘടനകള് എന്നിവരാണ് പ്രതിഷേധവുമായി രംഗത്തുള്ളത്. ഡിഫന്സ് മാനിഫാക്ച്ച്വറിങ് പ്രദര്ശനമായ ഡിഫ്എക്സ്പോ ഉദ്ഘാടനം ചെയ്യാനാണ് മോദി ചെന്നൈയിലെത്തിയത്. ചെന്നൈയില് നിന്നും അല്പം മാറി തിരുവിടന്തായ് എന്ന സ്ഥലത്താണ് പരിപാടി നടക്കുന്നത്.
പ്രതിഷേധക്കാര് റോഡുകള് ഉപരോധിച്ചതിനെ തുടര്ന്ന് ചെന്നൈ വിമാനത്താവളത്തില് നിന്നും ഹെലികോപ്ടര് മാര്ഗമാണ് മോദി തിരുവിടന്തായില് എത്തിയത്. മദ്രാസ് െഎ.െഎ.ടി കാമ്ബസ് ഗ്രൗണ്ടിലാണ് മോദി ഹെലികോപ്ടറിറങ്ങിയത്. അഡയാര് ക്യാന്സര് ഇന്സ്റ്റിറ്റ്യൂട്ടില് നടക്കുന്ന പരിപാടിയിലും മോദി പങ്കെടുക്കും.
