കൊച്ചി: മഹാരാജാസ് കോളെജ് വിദ്യാര്ഥി അഭിമന്യു കൊല്ലപ്പെട്ട കേസില് മുഖ്യപ്രതികളിലൊരാള് കൂടി പിടിയിലായി. നെട്ടൂര് സ്വദേശി റജീബ് ആണ് പിടിയിലായത്.
ക്യാംപസ് ഫ്രണ്ട് കൊച്ചി മേഖലാ ഭാരവാഹിയാണ് റജീബ്. അഭിമന്യുവിനെ കുത്തിയ സംഘത്തില് റജീബ് ഉണ്ടായിരുന്നതായി പൊലീസ് പറഞ്ഞു. ആക്രമണത്തിനായി ആയുധങ്ങളുമായാണ് റജീബ് എത്തിയത്. കര്ണാടകയില് നിന്ന് കൊച്ചിയിലേക്കുള്ള യാത്രാമധ്യേ ട്രെയിനില് വെച്ചാണ് റജീബ് പിടിയിലായത്.
ജൂലൈ 2ന് പുലര്ച്ചെയാണ് എറണാകുളം മഹാരാജാസ് കോളജിന്റെ പിന് ഗേറ്റിന് സമീപത്തെ ചുവര് എഴുന്നതിനെ ചൊല്ലിയുണ്ടായ സംഘര്ഷത്തിനിടെ എസ്ഡിപിഐ-ക്യാമ്പസ് ഫ്രണ്ട് പ്രവര്ത്തകര് അഭിമന്യൂവിനെ കുത്തിക്കൊന്നത്.
വിദ്യാര്ഥികള് തമ്മിലുള്ള വാക്കുതര്ക്കം അവസാനിപ്പിച്ച് മുഹമ്മദിന്റെ നേതൃത്വത്തിലുള്ളവര് മടങ്ങിയെങ്കിലും പിന്നീട് രാത്രിയില് പത്തിലേറെ ഇരുചക്രവാഹനങ്ങളിലെത്തിയ അക്രമികള് അഭിമന്യൂവിനെ അടിച്ചുവീഴ്ത്തിയ ശേഷം കുത്തുകയായിരുന്നു.