വാഷിംഗ്ടണ് ഡി.സി: ചൈനീസ് സോഷ്യല് മീഡിയ ആപ്ലിക്കേഷനായ ടിക് ടോക് അമേരിക്കയില് നിരോധിക്കുമെന്ന് പ്രസിഡന്റ് ഡൊണാള്ഡ് ട്രംപ്. ടിക് ടോക് ഉള്പ്പെടെയുള്ള ചൈനീസ് ആപ്പുകള്ക്ക് ഇന്ത്യ നിരോധനം ഏര്പ്പെടുത്തിയതിനു പിന്നാലെയാണ് യു.എസ് നടപടി.
ടിക് ടോക് നിരോധനം പരിഗണനയിലാണെന്നും അത് ഉടന് നടപ്പാക്കുമെന്നും ട്രംപ് മാധ്യമ പ്രവര്ത്തകരോട് പറഞ്ഞു. അമേരിക്കന് പൗരന്മാരുടെ വിവരങ്ങള് ചോര്ത്തുന്നുവെന്ന സംശയത്തിന്റെ അടിസ്ഥാനത്തിലാണ് നിരോധനത്തെപ്പറ്റി ആലോചിക്കുന്നതെന്ന് ട്രംപ് വ്യക്തമാക്കി.
ഞങ്ങള് ടിക് ടോക് വിഷയത്തില് ആലോചനയിലാണ്. ഉടന് അതിലൊരു തീരുമാനമെടുക്കുമെന്നും അദ്ദേഹം പറഞ്ഞു. ടെക്സാസിലേക്കുള്ള യാത്രയ്ക്കിടെ മാധ്യമപ്രവര്ത്തകരുമായുള്ള കൂടിക്കാഴ്ചയിലാണ് ട്രംപിന്റെ വെളിപ്പെടുത്തല്. ടിക് ടോക്ക് വിഷയത്തില് ഫോറിന് ഇന്വെസ്റ്റ്മെന്റ് വിഭാഗം അന്വേഷണം നടത്തി വരികയാണ്. തീരുമാനം അതിനുശേഷം അറിയിക്കുമെന്ന് അമേരിക്കന് ട്രഷറി സെക്രട്ടറി സ്റ്റീവന് ന്യൂക്കിന് പറഞ്ഞു.
അമേരിക്കയില് ടിക് ടോക്ക് ഉപയോക്താക്കളുടെ എണ്ണം 80 ദശലക്ഷത്തിലധികമാണ്. രാജ്യത്തു പൂര്ണ്ണമായി ടിക് ടോക്കിന് നിരോധനം ഏര്പ്പെടുത്തുമെന്ന കാര്യത്തില് അന്തിമ തീരുമാനമായിട്ടില്ല.
