നിയമസഭാ തെരഞ്ഞെടുപ്പില് മത്സരിക്കാനില്ലെന്ന് കെ.പി.സി.സി പ്രസിഡന്റ് വി.എം സുധീരന്. തീരുമാനം കോണ്ഗ്രസ് ഹൈക്കമാന്ഡിനെ അറിയിച്ചു. സ്ഥാനാര്ഥി പട്ടിക സംബന്ധിച്ച തര്ക്കം മുറുകുന്നതിനിടയ്ക്കാണ് സുധീരന് നിലപാട് വ്യക്തമാക്കിയിരിക്കുന്നത്. തെരഞ്ഞെടുപ്പില് പാര്ട്ടിയെ നയിക്കാനാണ് ആഗ്രഹമെന്നും അദ്ദേഹം അറിയിച്ചു.
പ്രശ്നങ്ങള് പരിഹരിക്കുവാന് സ്ക്രീനിംഗ് കമ്മറ്റി ഇന്ന് ന്യൂഡല്ഹിയില് വീണ്ടും ചേരുന്നുണ്ട്. തര്ക്കങ്ങള് ഇന്നത്തോടെ പരിഹരിക്കണമെന്നും കേന്ദ്ര തിരഞ്ഞെടുപ്പ് സമിതിയില് എത്തിക്കരുതെന്നും കേരളത്തില് നിന്നുള്ള നേതാക്കള്ക്ക് ഹൈക്കമാന്ഡ് കര്ശന നിര്ദേശം നല്കിയതായാണ് അറിയുന്നത്.
കോണ്ഗ്രസ് ഉപാധ്യക്ഷന് രാഹുല് ഗാന്ധിയും മുതിര്ന്ന നേതാവ് എ.കെ.ആന്റണിയും പ്രശ്നത്തില് ഇടപെട്ടതോടെ ഇരു ഗ്രൂപ്പുകള്ക്കും സ്വീകാര്യമായ തീരുമാനം ഹൈക്കമാന്ഡ് കൈക്കൊള്ളുമെന്ന് പ്രതീക്ഷിക്കാം. ആരോപണ വിധേയരും നാലില് കൂടുതല് തവണ മത്സരിച്ചവരും മാറി നില്ക്കണമെന്ന നിര്ദ്ദേശം സുധീരന് അവതരിപ്പിച്ചതോടെയാണ് പ്രശ്നങ്ങള്ക്ക് തുടക്കം. മന്ത്രിമാരായ കെ.സി. ജോസഫ്, കെ.ബാബു, അടുര് പ്രകാശ് എന്നിവരുടെയും ബെന്നി ബെഹനാന്റെയും സീറ്റുകളിലേക്ക് സുധീരന് സ്ഥാനാര്ഥികളെ നിര്ദേശിച്ചതോടെ അദ്ദേഹത്തിനെതിരെ എ, ഐ ഗ്രൂപ്പുകള് ശക്തമായി രംഗത്തുവന്നിരുന്നു.