ഹരിയാന: ബലാത്സംഗങ്ങള് സമൂഹത്തിന്റെ ഭാഗമാണെന്ന പ്രസ്താവനയുമായി ഹരിയാന പോലീസ് മേധാവി. എഡിജിപി ആര്.സി മിശ്രയാണ് ഇത്തരത്തിലൊരു വിവാദ പരാമര്ശം നടത്തിയത്. ഹരിയാനയില് കഴിഞ്ഞ ദിവസം 15കാരിയായ പെണ്കുട്ടി പീഡനത്തിനിരയായി കൊല്ലപ്പെട്ടിരുന്നു. ഈ സംഭവത്തില് മാധ്യമങ്ങളോട് പ്രതികരിക്കുകയായിരുന്നു അദ്ദേഹം.
”ബലാത്സംഗങ്ങള് സമൂഹത്തിന്റെ ഭാഗമാണ്, ഇത്തരം സംഭവങ്ങള് എല്ലായ്പ്പോഴും നടക്കുന്നുണ്ട്. പോലീസിന്റെ ജോലി സംഭവം അന്വേഷിക്കുക, ക്രിമിനലുകളെ പിടികൂടുക, കുറ്റകൃത്യം തെളിയിക്കുക എന്നിവയാണ്. ഇതിനായി പോലീസിനെക്കൊണ്ട് ചെയ്യാവുന്നതെല്ലാം ചെയ്യും”- മിശ്ര വ്യക്തമാക്കി.
കഴിഞ്ഞ ദിവസമാണ് കുരുക്ഷേത്രയ്ക്ക് സമീപം ട്യൂഷനുപോയ പെണ്കുട്ടിയെ കാണാതാവുന്നത്. ശനിയാഴ്ച പെണ്കുട്ടിയുടെ മൃതദേഹം വികൃതമാക്കിയ നിലയില് കണ്ടെത്തുകയും ചെയ്തു. സംഭവുമായി ബന്ധപ്പെട്ട് പോലീസ് സംശയിക്കുന്ന 19 കാരനായ പ്ലസ്ടു വിദ്യാര്ഥിയെയും കൊല്ലപ്പെട്ടനിലയില് ഇന്ന് കണ്ടെത്തി.