കറാച്ചി: ഇന്ത്യന്‍ ദേശവികാരം ഉണര്‍ത്തുന്ന ‘ഫിര്‍ ഫി ദില്‍ഹേ ഹിന്ദുസ്ഥാനി’ എന്ന ബോളിവുഡ് ഗാനത്തിന് നൃത്തം ചവിട്ടി കറാച്ചി സ്‌കൂളിലെ വിദ്യാര്‍ഥികള്‍. ത്രിവര്‍ണ പതാകയെ പശ്ചാത്തലമാക്കി ആയിരുന്നു കുട്ടികളുടെ നൃത്തം. സംഭവം വിവാദമായതോടെ അധികൃതര്‍ സ്കൂളിന്റെ രജിസ്‌ട്രേഷന്‍ സസ്‌പെന്‍ഡ് ചെയ്തു.
കറാച്ചിയിലെ മമാ ബേബി കെയര്‍ സ്‌കൂളിലെ വിദ്യാര്‍ഥികളാണ് ഷാരൂഖ് ചിത്രത്തിലെ ഗാനത്തിനൊപ്പം ചുവടുവെച്ചത്. കുട്ടികളുടെ ഡാന്‍സിനിടെ സ്റ്റേജിലെ സ്‌ക്രീനില്‍ ഇന്ത്യന്‍ പതാകയും പ്രദര്‍ശിപ്പിച്ചു. നൃത്തത്തിന്‍റെ വീഡിയോ സോഷ്യല്‍ മീഡിയയില്‍ വൈറലായതോടെ പാക് അധികൃതരുടെ ശ്രദ്ധയില്‍പ്പെടുകയായിരുന്നു.
സിന്ധ് പ്രവിശ്യയിലെ ഡയറക്‌ട്രേറ്റ് ഓഫ് ഇന്‍സ്‌പെക്ഷന്‍ ആന്‍ഡ് രജിസ്‌ട്രേഷന്‍ ഓഫ് പ്രൈവറ്റ് ഇന്‍സ്റ്റിസ്റ്റ്യൂഷന്‍ അധികൃതരാണ് സ്‌കൂളിനെതിരെ നടപടി എടുത്തത്. രാജ്യത്തിന്‍റെ അന്തസിന് എതിരാണെന്നും അത്യന്തം ആക്ഷേപകരമായ പ്രവര്‍ത്തിയാണിതെന്നും അധികൃതര്‍ വിലയിരുത്തി. ഡയറക്‌ട്രേറ്റിന് മുമ്പാകെ ഹാജരാകണമെന്ന് സ്‌കൂള്‍ അധികൃതരോട് അധികൃതര്‍ കത്തില്‍ ആവശ്യപ്പെട്ടു.
എന്നാല്‍ സംഭവത്തില്‍ സ്‌കൂള്‍ അധികൃതര്‍ പ്രതികരിച്ചിട്ടില്ല. സ്കൂളിന്റെ എല്ലാ ബ്രാഞ്ചുകളുടേയും രജിസ്‌ട്രേഷന്‍ സസ്‌പെന്‍ഡ് ചെയ്യാനുള്ള നീക്കത്തിലാണ് വിദ്യാഭ്യാസ വകുപ്പ്.
