ഇന്ത്യയിലെ ഏറ്റവും വില കുറഞ്ഞ ബൈക്ക് എത്തി

ഇന്ത്യയിലെ ഏറ്റവും വില കുറഞ്ഞ ബൈക്ക് എന്ന ഖ്യാതി ബജാജ് CT100 കൈയ്യടക്കിയിട്ട് കാലം കുറച്ചായി. ബജാജ് CT100 നെക്കാളും കുറഞ്ഞ വിലയില്‍ മറ്റൊരു മോഡലിനെ അവതരിപ്പിക്കാന്‍ പ്രധാന എതിരാളിയായ ഹീറോയ്ക്ക് ഇന്നു വരെ സാധിച്ചിട്ടില്ല.

എന്നാല്‍ ഇപ്പോള്‍ CT100 ന്‍റെ വില വീണ്ടും വെട്ടിക്കുറച്ച് ബജാജ് അത്ഭുതം കാട്ടിയിരിക്കുകയാണ്. CT100 നിരയിലേക്ക് കൂടുതല്‍ ഫീച്ചറുകളുള്ള പുതിയ വകഭേദങ്ങളെ അടുത്തിടെയാണ് ബജാജ് സമര്‍പ്പിച്ചത്.

കമ്പനിയുടെ ഔദ്യോഗിക വെബ്‌സൈറ്റ് പ്രകാരം 32,653 രൂപ വിലയുണ്ടായിരുന്ന CT100B യെ ഇനി 30,714 രൂപ എക്‌സ്‌ഷോറൂം വിലയില്‍ ഉപഭോക്താക്കള്‍ക്ക് സ്വന്തമാക്കാം. നേരത്തെ ഇതിന് 41,997 രൂപയായിരുന്നു പ്രൈസ്ടാഗ്.

എന്നാല്‍ CT100 ന്‍റെ ഇടത്തരം KS അലോയ് പതിപ്പിലാണ് കാര്യമായ വിലക്കുറവ്. യഥാര്‍ത്ഥ വിലയില്‍ നിന്നും 6,835 രൂപയുടെ കുറവാണ് KS അലോയ് പതിപ്പ് രേഖപ്പെടുത്തുന്നത്. 38,637 രൂപ വിലയില്‍ എത്തിയിരുന്നു CT100 KS അലോയ് ഇനി 31,802 രൂപ പ്രൈസ്ടാഗിലാണ് ഷോറൂമുകളില്‍ ലഭ്യമാവുക. ഏറ്റവും താഴ്ന്ന CT100B യെക്കാളും ആയിരം രൂപ മാത്രമാണ് ഇടത്തരം KS അലോയ് പതിപ്പിന് കൂടുതല്‍.

പ്രാദേശിക മേഖലകളില്‍ ബജറ്റ് ബൈക്കുകള്‍ക്ക് ആവശ്യക്കാരേറുന്നതിന്‍റെ അടിസ്ഥാനത്തിലാണ് ബജാജിന്‍റെ പുതിയ നടപടി. കര്‍ഷകരെയാണ് CT100 ബൈക്കുകള്‍ ബജാജ് പ്രധാനമായും ലക്ഷ്യമിടുന്നത്.

ബൈക്കിലുള്ള 99.27 സിസി ഒറ്റ സിലിണ്ടര്‍ എഞ്ചിന്‍ പരമാവധി 7.6 bhp കരുത്തും 8.24 Nm torque ഉം സൃഷ്ടിക്കും. നാലു സ്പീഡ് ഗിയര്‍ബോക്‌സാണ് CT100 പതിപ്പുകളില്‍. ബേസ് വേരിയന്‍റ്  CT100B യില്‍ 104 കിലോമീറ്ററാണ് ബജാജ് വാഗ്ദാനം ചെയ്യുന്ന ഇന്ധനക്ഷമത. റോഡ് സാഹചര്യങ്ങളില്‍ 85 കിലോമീറ്ററില്‍ കൂടുതല്‍ ഇന്ധനക്ഷമത കാഴ്ചവെക്കാന്‍ CT100 ന് സാധിക്കുന്നുണ്ട്.