ന്യഡല്‍ഹി: അതിര്‍ത്തി പ്രദേശങ്ങളായ കാലാപാനി, ലിപുലേഖ്, ലിംപിയാധുര എന്നിവയെ ഇന്ത്യയില്‍നിന്ന് തിരിച്ചുപിടിച്ചു രാജ്യത്തോടു ചേര്‍ക്കുമെന്നു നേപ്പാള്‍ പ്രധാനമന്ത്രി കെ.പി. ശര്‍മ ഒലി. നേപ്പാള്‍ വിദേശകാര്യമന്ത്രി പ്രദീപ് ഗ്യാവലി അടുത്ത ദിവസം ഇന്ത്യ സന്ദര്‍ശിക്കാനിരിക്കെയാണ് ഒലിയുടെ ഈ പ്രസ്താവന.
സുഗോളി ഉടന്പടി പ്രകാരം മഹാകാളി നദിയുടെ കിഴക്കായി സ്ഥിതി ചെയ്യുന്ന കാലാപാനി, ലിംപിയാധുര, ലിപുലേഖ് എന്നിവ നേപ്പാളിന്‍റെ ഭാഗമാണ്. ഇന്ത്യയുമായുള്ള നയതന്ത്ര ചര്‍ച്ചകളില്‍ ഇക്കാര്യം ഉന്നയിക്കും. 1962-ലെ ഇന്ത്യ-ചൈന യുദ്ധത്തെ തുടര്‍ന്ന് ഇന്ത്യന്‍ സൈന്യം ഈ മേഖലയില്‍ നിലയുറപ്പിച്ചിരിക്കുകയാണ്. നേപ്പാളി ഭരണാധികാരികള്‍ ഈ മേഖല തിരിച്ചുപിടിക്കാന്‍ ഒരു ശ്രമവും നടത്തിയിട്ടില്ലെന്നും പ്രധാനമന്ത്രി പറഞ്ഞു. കാലാപാനി നേപ്പാളിന്‍റെ പ്രദേശമാണെന്നും അദ്ദേഹം അവകാശപ്പെട്ടു.
കാലാപാനി, ലിംപിയാധുര, ലിപുലേഖ് പ്രദേശങ്ങള്‍ ഉള്‍പ്പെടുത്തി മാസങ്ങള്‍ക്കുമുന്പു പ്രധാനമന്ത്രി നേപാളിന്‍റെ പുതിയ ഭൂപടം പ്രസിദ്ധീകരിച്ചതു വിവാദമായിരുന്നു. ചൈനയുമായി അതിര്‍ത്തി പങ്കിടുന്ന തന്ത്രപ്രധാനമായ ഈ മേഖലയില്‍ ഇന്ത്യ ഒരു പുതിയ റോഡ് നിര്‍മിച്ചതിനു പിന്നാലെയാണു നേപ്പാള്‍ ഭൂപടം പ്രസിദ്ധീകരിച്ചത്.
