പൊരിവെയിലത്ത് പപ്പടം വിറ്റു നടക്കുന്ന ആളെ ശ്രദ്ധിച്ചപ്പോഴാണ് ആള്ക്കാര്ക്ക് ആളെ പിടികിട്ടിയത്. സാക്ഷാല് ഹൃത്വിക് റോഷന്. താരത്തെ കണ്ടതും ജനം അമ്പരന്നു. പൊരിവെയിലത്ത് ക്ഷീണിതനായി സൈക്കിളില് റോഡില് അലഞ്ഞു നടക്കുകയാണ് ബോളിവുഡിന്റെ പ്രിയതാരം.
ജയ്പൂരിലെ തിരക്കുള്ള റോഡില് വിയര്പ്പ് നിറഞ്ഞ ഷര്ട്ടുമിട്ടാണ് ഹൃത്വിക് സൈക്കിളില് എത്തിയത്. ‘സൂപ്പര് 30’ എന്ന ചിത്രത്തിന് വേണ്ടിയാണ് ഹൃത്വിക്കിന്റെ കിടിലന് മേക്ക് ഓവര്. ബിഹാറില് നിന്നുള്ള ഗണിത ശാസ്ത്രജ്ഞന് ആനന്ദ് കുമാറിന്റെ ജീവിതമാണ് സൂപ്പര് 30 എന്ന സിനിമ പറയുന്നത്. താടിയും മുടിയും വളര്ത്തി അലക്ഷ്യമായെത്തിയ ചിത്രത്തിന്റെ ഫസ്റ്റ് ലുക്ക് പോസ്റ്റര് വൈറലായിരുന്നു.
ഐ.ഐ.ടിയില് ചേര്ന്ന് പഠിക്കാന് ആഗ്രഹിക്കുന്ന പട്നയിലെ നിര്ധനരായ വിദ്യാര്ത്ഥികള്ക്ക് അവരുടെ ലക്ഷ്യ പൂര്ത്തീകരണത്തിനായി സൂപ്പര് 30 എന്ന പദ്ധതി ആരംഭിച്ച വ്യക്തിയാണ് ആനന്ദ് കുമാര്. ഈ പദ്ധതി വഴി വര്ഷം തോറും പാവപ്പെട്ട കുടുംബത്തില് നിന്നും തിരഞ്ഞെടുക്കുന്ന മുപ്പത് വിദ്യാര്ത്ഥികള്ക്ക് ഐ.ഐ.ടി-ജെ.ഇ.ഇ എന്ട്രന്സ് പരീക്ഷകള് നേരിടാനുള്ള സൗജന്യ ട്യൂഷന് നല്കുകയാണ് ചെയ്യുന്നത്. 15 വര്ഷത്തിനിടെ 450 വിദ്യാര്ത്ഥികളെയാണ് ആനന്ദ് കുമാര് എഞ്ചിനിയറിംഗ് കോളേജിലേക്കയച്ചത്.