എന്താണ് വൈറസ് ? വൈറസിന് മരുന്നില്ലാത്തത് എന്തുകൊണ്ട്? ഡോക്ടറുടെ കുറിപ്പ് വൈറല്‍

വൈറസ് എന്താണെന്നും വൈറസിന് മരുന്ന് ഇല്ലാത്തതെന്തെന്നും വ്യക്തമാക്കി തിരുവനന്തപുരം വനിതാ കോളേജിനെ സുവോളജി വിഭാഗം മുന്‍ മേധാവി ഡോ.മോഹന്‍ കുമാറിന്റെതെന്ന പേരില്‍ സോഷ്യല്‍ മീഡിയയില്‍ പ്രചരിക്കുന്ന കുറിപ്പ് വൈറലാകുന്നു. വൈറസ് എന്താണെന്ന്, സാധാരണക്കാര്‍ക്ക് മനസിലാകുന്ന തരത്തില്‍ വളരെ ലളിതമായ ഭാഷയില്‍ പറഞ്ഞു തരുന്ന കുറിപ്പിന്റെ പൂര്‍ണരൂപം ചുവടെ,

വൈറസിനെന്തേ മരുന്നില്ലാത്തത്

പരിണാമത്തിന്റെ ഒരു അബദ്ധം ആണ് വൈറസ് .ജീവനുണ്ടോ ? ഉണ്ട് .ജീവനില്ലേ ? ഇല്ല .ഭൂലോകത്തു കാണുന്ന ഒന്നിനും ഇല്ലാത്ത പ്രത്യേകത .ജീവനുള്ള ഒരു കോശത്തില്‍ എത്തിയാല്‍ വൈറസിന് ജീവന്‍ വെക്കും .കോശത്തില്‍ നിന്നും പുറത്തിറങ്ങിയാല്‍ ജീവന്‍ പോകും .കക്ഷി ശ്വസിക്കില്ല ,ആഹാരം കഴിക്കില്ല ,വിസര്‍ജിക്കില്ല .ഒന്നുമില്ല . ഒരസാധാരണ ജന്മം .

കാര്യം വേറൊന്നുമല്ല .വൈറസ് എന്ന് പറയുന്നത് ‘പൊതിഞ്ഞു വച്ചിരിക്കുന്ന ഒരു DNA / RNA ‘ മാത്രമാണ് .ഒരു പ്രോടീന്‍ ചെപ്പിനുള്ളില്‍ ഒരു Nucleic Acid .അത്രമാത്രം .DNA ഉള്ളതിനെ DNA Virus എന്നും RNA ഉള്ളതിനെ RNA വൈറസ് എന്നും വിളിക്കും .എല്ലാ ജീവികളുടെയും ജനിതക വസ്തുവാണ് DNA (De Oxy Ribonucleic Acid ).കോശത്തിലെ ക്രോമോസോമില്‍ ഉള്ളത് .DNA യുടെ നിര്‍ദേശം അനുസരിച്ചു പ്രോടീന്‍ ഉണ്ടാക്കലാണ് ന്യുക്ലിയസിനു പുറത്തു കാണുന്ന RNA (Ribonucleic Acid) യുടെ ജോലി .

ഇങ്ങിനെ RNA യെ കൊണ്ട് പണിയും ചെയ്യിച്ചു DNA രാജകീയമായി വാഴുമ്ബോള്‍ ആണ് വൈറസ് എന്ന ആ ‘പൊടിക്കുപ്പി ‘എത്തുന്നത് .കക്ഷി മൂക്കിലൂടെയോ വായിലൂടെയോ അകത്തു പെട്ടുപോയതാണ് .ജീവനുള്ള കോശത്തെ കാണുമ്ബൊള്‍ പൊടിക്കുപ്പി ഉണരും .പിന്നെയങ്ങോട്ട് ബഹളമാണ് .കോശത്തിന്റെ പുറത്തു ചാടി കയറും .ഒരു വിമാനം ഇറങ്ങുന്നതുപോലെ .ചുറ്റും ഉള്ള കാലുകള്‍ പോലുള്ള തന്തുക്കള്‍ കൊണ്ട് കോശത്തിന്റെ പുറത്തു അമര്‍ന്നിരിക്കും .

പിന്നെ ഉള്ളിലെ DNA അകത്തേക്ക് കുത്തി വക്കും .DNA പോയി കഴിഞ്ഞാല്‍ പൊടിക്കുപ്പി ഇളകി തെറിക്കും .ബാക്കിയൊക്കെ ഉള്ളില്‍ എത്തിയ DNA യുടെ പണിയാണ് . അത് ഉള്ളില്‍ ചെന്ന് അധികാരം കൈയ്യടക്കും .എന്നിട്ട് കോശത്തിന്റെ RNA യോട് സ്വന്തം കൂട് ഉണ്ടാക്കാനുള്ള പ്രോടീന്‍ തരാന്‍ ആജ്ഞാപിക്കും .RNA ക്ക് അനുസരിക്കാതിരിക്കാന്‍ പറ്റില്ല .അതുവരെ നിയന്ത്രിച്ചിരുന്ന സ്വന്തം Boss നെ കടന്നുവന്ന DNA വിരട്ടി നിര്‍ത്തിയിരിക്കുകയാണ് .

ഗത്യന്തരമില്ലാതെ RNA ,വൈറസ് DNA പറയുന്ന പോലെ പ്രോടീന്‍ കൂടുകള്‍ (Capsid ) ഉണ്ടാക്കി കൊടുക്കും .അതും കോശം സൂക്ഷിച്ചിരിക്കുന്ന അമിനോ ആസിഡുകള്‍ കൊണ്ട് .കൂടുകള്‍ റെഡിയായി കഴിഞ്ഞാല്‍ പിന്നെ വൈറസ് DNA ക്ക് പിടിപ്പത് പണിയാണ് .ഒരു DNA ഉള്ളില്‍ കടന്നുവെങ്കിലും അത് പലതായി വിഭജിച്ചു ഓരോ പുതിയ DNA യും ഓരോ കൂടില്‍ കടക്കും .അങ്ങിനെ കോശം നിറയെ പുതിയ വൈറസുകള്‍ .പിന്നെ എല്ലാവരും ജാഥയായി കോശത്തിനെ പൊട്ടിച്ചു പുറത്തിറങ്ങും .

വഴിപിരിഞ്ഞു പിന്നെ മറ്റ് കോശങ്ങളില്‍ ആക്രമണം തുടങ്ങും .കഥകളിലെ ചില അസുരന്മാരെ പോലെ .ഒരുതുള്ളി ചോരയില്‍ നിന്നും ഒരായിരം അസുരന്മാര്‍ ഉണ്ടാകുന്നതു പോലെ ഒറ്റ വൈറസില്‍ നിന്നും ലക്ഷകണക്കിന് എണ്ണം .എല്ലാംകൂടി കോശങ്ങളെ തളര്‍ത്തി അസുഖം ആക്കി മാറ്റും .

പക്ഷേ ശരീരം വെറുതേ ഇരിക്കില്ല .സ്വന്തം ആന്റിബോഡികളെ ഇറക്കി എല്ലാത്തിനെയും ഓടിക്കും .വൈറസ് പനിയെ പറ്റി പറയുമ്ബോള്‍ ഒരു ചൊല്ലുണ്ട് .’മരുന്ന് കഴിച്ചാല്‍ ഒരാഴ്ച കൊണ്ടും മരുന്ന് കഴിച്ചില്ലെങ്കില്‍ 7 ദിവസം കൊണ്ടും പനി മാറും ‘.മരുന്ന് നിരര്‍ത്ഥകം എന്ന് ചുരുക്കം .ശരീരം തീര്‍ക്കുന്ന സ്വയം പ്രതിരോധം മാത്രമേ വൈറസിനെ ഓടിക്കാന്‍ തല്‍കാലം ഉപായമായുള്ളു .വൈറസ് തളര്‍ത്തിയ ശരീരത്തില്‍ മുതലെടുപ്പിനായി ബാക്ടീരിയ എത്തും .അതിനെ നശിപ്പിക്കാന്‍ Antibiotic സഹായിക്കും .

വൈറസിനെതിരെ മരുന്ന് ഉണ്ടാക്കാനുള്ള പരിമിതി അതിന്റെ സ്വഭാവം കാരണമാണ് .വൈറസ് ,ബാക്ടീരിയ പോലെ ഒരു ജീവിയല്ല .ആകെ സജീവമായി ഉള്ളത് DNA അല്ലെങ്കില്‍ RNA അത് രണ്ടും കോശത്തിലെ DNA ,RNA പോലെയുള്ളതും .അപ്പോള്‍ അതിനെ നശിപ്പിക്കാന്‍ ഉള്ള മരുന്ന് കോശത്തിലെ DNA ,RNA എന്നിവയെയും ബാധിക്കും .

ഏക വഴി ശരീരത്തിന്റെ പ്രതിരോധ ശക്തി കൂട്ടാന്‍ ആന്റിബോഡികള്‍ കൊണ്ട് നിറയ്ക്കുകയാണ് .അതാണ് വാക്സിനേഷന്‍ .ഒരു രോഗത്തിന്റെ വൈറസിനെ നിര്‍ജീവം ആക്കി നിര്‍മ്മിക്കുന്നതാണ് വാക്സിന്‍ .അത് കുത്തി വെക്കുമ്ബോള്‍ ശരീരം വിചാരിക്കും ജീവനുള്ള വൈറസ് ആണെന്ന് .അങ്ങിനെ തെറ്റിദ്ധരിച്ചു അതിനെതിരെ ആന്റിബോഡികള്‍ ഉണ്ടാക്കും .വാക്സിനില്‍ ഉള്ള നിര്‍ജ്ജീവ വൈറസ് രോഗം ഉണ്ടാക്കുകയും ഇല്ല

വാക്സിനേഷന്‍ വഴി ഉണ്ടായ ആന്റിബോഡികള്‍ കാവല്‍ നില്‍ക്കുമ്ബോള്‍ ശരിയായ വൈറസ് വന്നുപെട്ടാല്‍ അപ്പൊ തീരും .കാരണം ആ വൈറസിനെതിരെ നിര്‍മ്മിച്ച ആന്റിബോഡികള്‍ ആണ് കാവല്‍ നില്‍ക്കുന്നത് .

ചില RNA വൈറസുകള്‍ക്കെതിരെ മരുന്നുകള്‍ കണ്ടുപിടിച്ചിട്ടുണ്ട് .DNA വൈറസ് വിഭജിക്കുന്നതില്‍ നിന്നും വ്യത്യസ്തമായാണ് RNA വൈറസു വിഭജിക്കുന്നത് .അതിന് വേണ്ട എന്‍സൈമുകളെ മരുന്ന് നിര്‍ജ്ജീവമാക്കി RNA വിഭജനം തടയും .പക്ഷേ എല്ലാ RNA വൈറസിലും ഇത് നടക്കില്ല .ബാക്റ്റീരിയയെ നശിപ്പിക്കാന്‍ ഉപയോഗിക്കുന്ന ചില Antibiotic , RNA വൈറസു വിഭജനം തടയുമെന്നു കണ്ടിട്ടുണ്ട് .ഫലം വൈറസിനെ ആശ്രയിച്ചിരിക്കും .

Courtesy: D.Mohan kumar, Former HOD of Zoology, Govt. College for Women, Trivandrum.’