ജനീവ: ചൈനയില് നിന്നും 30ഓളം രാജ്യങ്ങളിലേക്ക് പടര്ന്ന കൊറോണ വൈറസിനെതിരെ രാജ്യങ്ങള് ജാഗ്രത പാലിക്കണമെന്ന് ലോകാരോഗ്യ സംഘടനയുടെ നിര്ദേശം. കൊറോണ വൈറസ് കൂടുതല് പ്രദേശങ്ങളിലേക്ക് പടരാതിരിക്കാന് മുന്കരുതലുകള് സ്വീകരിക്കണം. പശ്ചിമേഷ്യയിലും യൂറോപ്പിലും കൊറോണ ബാധിച്ച് മരണപ്പെടുന്നവരുടെയും രോഗ ബാധിതരുടെയും എണ്ണം വര്ധിക്കുന്നതിനെ തുടര്ന്നാണ് നിര്േദശം.
കൊറോണ വൈറസ് ബാധയുടെ ഉത്ഭവ കേന്ദ്രമായ ചൈനയില് പുതുതായി 508 പേര്ക്ക് കൂടി വൈറസ് ബാധ സ്ഥിരീകരിച്ചു. കൂടാതെ 71 മരണവും റിപ്പോര്ട്ട് ചെയ്തു. വുഹാന് നഗരത്തില് മാത്രം കഴിഞ്ഞദിവസം 68 പേരാണ് മരിച്ചത്. ഇതുവരെ 77,658 പേര്ക്കാണ് ചൈനയില് ഇതുവരെ രോഗം സ്ഥിരീകരിച്ചത്. മരണസംഖ്യ 2663 ആയി ഉയരുകയും ചെയ്തു.
ദക്ഷിണ കൊറിയ, ഇറാന്, ഇറ്റലി എന്നിവിടങ്ങിലേക്ക് വൈറസ് ബാധ പടരുന്നത് സംബന്ധിച്ച് ഉത്കണ്ഠയും രേഖപ്പെടുത്തി. കഴിഞ്ഞവര്ഷം അവസാനമാണ് ചൈനയില് കൊറോണ ബാധ സ്ഥിരീകരിച്ചത്. പിന്നീട് വിവിധ രാജ്യങ്ങളിലേക്ക് പടര്ന്നുപിടിക്കുകയും മരണനിരക്ക് ഉയരുകയും ചെയ്തു. മാസങ്ങള് കഴിഞ്ഞിട്ടും വൈറസ് വിവിധ രാജ്യങ്ങളിലേക്ക് പടര്ന്നുകൊണ്ടിരിക്കുന്നതില് ആശങ്കയുണ്ടെന്നും ലോകാരോഗ്യ സംഘടന വ്യക്തമാക്കി.
ഇറ്റലിയില് ഏഴുപേര് കൊറോണ ബാധിച്ച് മരിക്കുകയും 200 ഓളം പേര്ക്ക് രോഗം സ്ഥിരീകരിക്കുകയും ചെയ്തിട്ടുണ്ട്. രോഗം പടരാനുള്ള സാധ്യത കണക്കിലെടുത്ത് പൊതുപരിപാടികള് ഒഴിവാക്കാന് അധികാരികള് നിര്േദശം നല്കുകയും ചെയ്തു.
ഇറാനില് 12 പേരാണ് കൊറോണ ബാധിച്ച് ഇതുവരെ മരിച്ചത്. അയല് രാജ്യങ്ങളായ ഇറാഖ്, കുവൈത്ത്, ബഹ്റൈന്, ഒമാന്, അഫ്ഗാനിസ്താന് എന്നിവിടങ്ങളിലും കൊറോണ ബാധ റിപ്പോര്ട്ട് ചെയ്തു. ഇറാനില് നിന്നാണ് മറ്റു രാജ്യങ്ങളിലേക്ക് വൈറസ് പടര്ന്നതെന്നാണ് നിഗമനം.
ദക്ഷിണകൊറിയയില് പുതുതായി 231 കൊറോണ കേസുകളാണ് റിപ്പോര്ട്ട് ചെയ്തത്. ഇതുവരെ 833 പേര്ക്ക് രോഗം സ്ഥിരീകരിച്ചു.