ന്യൂഡല്ഹി: പ്രധാനമന്ത്രി നരേന്ദ്ര മോദി വിവാഹിതനല്ലെന്ന മധ്യപ്രദേശ് ഗവര്ണര് ആനന്ദിബെന് പട്ടേലിന്റെ പ്രസ്താവനയ്ക്കെതിരേ, മോദിയുടെ ഭാര്യ യശോദബെന് രംഗത്ത്. ലോക്സഭാ തെരഞ്ഞെടുപ്പില് ഉള്പ്പെടെ സമര്പ്പിച്ചിട്ടുള്ള സത്യവാങ്മൂലങ്ങളില് മോദി തന്റെ പേര് പരാമര്ശിച്ചിട്ടുള്ളതാണെന്ന് യശോദബെന് സഹോദരനായ അശോക് മോദിയുടെ മൊബൈലില് പകര്ത്തി പുറത്തുവിട്ട വീഡിയോയില് പറഞ്ഞു.
മോദി എന്നെ വിവാഹം കഴിച്ചിട്ടുണ്ട്. ഇത്രയും വിദ്യാഭ്യാസമുളള ആനന്ദിബെന് ഒരു അധ്യാപികയെ കുറിച്ച് പറയേണ്ടതല്ല പറഞ്ഞത്. ഇന്ത്യയുടെ പ്രധാനമന്ത്രിയുടെ പ്രതിച്ഛായയാണ് അവര് തകര്ക്കുന്നത്. അദ്ദേഹത്തെ ഞാന് വളരെയധികം ബഹുമാനിക്കുന്നു, അദ്ദേഹം എനിക്ക് രാമനാണ്- യശോദബെന് പറയുന്നു. യശോദബെന്നിന്റെ സഹോദരന് വീഡിയോയിലുള്ളത് അവര്തന്നെയാണെന്നു സ്ഥിരീകരിച്ചു.
നരേന്ദ്ര ഭായ് വിവാഹിതനല്ല, പക്ഷേ, ജനനസമയത്തിനു മുമ്പും ശേഷവും സ്ത്രീകളും കുട്ടികളും അനുഭവിക്കുന്ന വേദനയും പ്രശ്നങ്ങളും അദ്ദേഹത്തിന് മനസിലാകും എന്നായിരുന്നു ഗുജറാത്ത് മുന് മുഖ്യമന്ത്രികൂടിയായ ആനന്ദിബെന് പട്ടേലിന്റെ പരാമര്ശം.
നേരത്തെ, ലോക്സഭാ തെരഞ്ഞെടുപ്പിനു സമര്പ്പിച്ച നാമനിര്ദേശപത്രികയില് യശോദബെന്നിന്റെ പേര് ഭാര്യയുടെ കോളത്തില് മോദി ചേര്ത്തിരുന്നു. സഹോദരന് അശോക് മോദിക്കൊപ്പം ഉന്ഝ ടൗണിലാണു യശോദ താമസിക്കുന്നത്. നരേന്ദ്ര മോദി പ്രധാനമന്ത്രിയായി സത്യപ്രതിജ്ഞ ചെയ്തതിനുശേഷം സായുധരായ പത്തു പോലീസുകാരെ യശോദയുടെ സുരക്ഷയ്ക്കായി മെഹ്സാന പോലീസ് നിയമിച്ചിരുന്നു. മോദി ചെറുപ്പത്തില് യശോദയെ വിവാഹം ചെയ്തെന്നും പിന്നീട് ഇവരെ വിട്ടുപോയെന്നുമാണു പറയപ്പെടുന്നത്.

