മേപ്പാടി: വാളത്തൂര് ബാലന്കുണ്ട് ആദിവാസി കോളനിയിലെ കുടുംബങ്ങള് ഉപയോഗിച്ചിരുന്ന വഴി സ്വകാര്യ റിസോര്ട്ട് ഉടമകള് മുള്ളുവേലി അടച്ചത് പരാതികളെത്തുടര്ന്ന് വനംവകുപ്പ് പ്രത്യേക സ്ക്വാഡ് വീണ്ടും തുറന്നുകൊടുത്തു. കോളനിയിലേക്കുള്ള വഴി അടച്ചശേഷം തൊട്ടപ്പുറത്തെ വനത്തിലൂടെ അടിക്കാട് വെട്ടിത്തെളിച്ച് താല്ക്കാലിക നടവഴി റിസോര്ട്ടുകാര് തന്നെ വെട്ടിക്കൊടുത്തിരുന്നു. എന്നാല്, സ്ത്രീകളും കുട്ടികളുമടങ്ങുന്നവര്ക്ക് നടന്നുപോകാന് കഴിയാത്ത രീതിയിലായിരുന്നു വഴി. കുണ്ടും കുഴികളും താണ്ടി സാഹസികയാത്ര നടത്തിവേണം അവര്ക്ക് കോളനിയിലെത്താന്.
മേപ്പാടി വനം റേഞ്ചിന് കീഴില് ബഡേരി സെക്ഷന് പരിധിയിലാണ് ബാലന്കുണ്ട് ചോലനായ്ക്ക കോളനി. ഒന്നിലധികം കുടുംബങ്ങളില്പെട്ട 12 പേരാണ് ബാലന്കുണ്ടില് കഴിയുന്നത്. പ്രാക്തന ഗോത്രവിഭാഗത്തില്പെടുന്ന ഇവര്ക്ക് റോഡ്, വൈദ്യുതി, അടച്ചുറപ്പുള്ള വീട് തുടങ്ങിയ സൗകര്യങ്ങളൊന്നും ലഭ്യമായിട്ടില്ല.