മണ്ണാര്‍ക്കാട്: പൊലീസ് കസ്റ്റഡിയില്‍നിന്നു ചാടിപ്പോയ പ്രതിക്കായി തിരച്ചില്‍ ഊര്‍ജിതമാക്കി.
മോഷണവുമായി ബന്ധപ്പെട്ട് കഴിഞ്ഞ ദിവസം കസ്റ്റഡിയിലെടുത്ത കൈതച്ചിറ സ്വദേശി ജിന്‍റോക്കായാണ് പൊലീസ് തിരച്ചില്‍ നടത്തുന്നത്. പ്രത്യേക സ്ക്വാഡ് രൂപവത്കരിച്ച്‌ മണ്ണാര്‍ക്കാടും പരിസരങ്ങളിലും മണ്ണാര്‍ക്കാടിന് പുറത്തുമായാണ് തിരച്ചില്‍ നടത്തുന്നത്.
ബുധനാഴ്ച വൈകീട്ട് ഏഴോടെ താലൂക്ക് ആശുപത്രിയിലേക്ക് വൈദ്യപരിശോധനക്കായി എത്തിച്ചപ്പോഴാണ് ജിന്‍റോ രക്ഷപ്പെട്ടത്. പരിശോധനക്കായി ഒരു കൈയിലെ വിലങ്ങഴിച്ചപ്പോള്‍ ഒപ്പമുണ്ടായിരുന്ന പൊലീസുകാരെ തള്ളിമാറ്റി ജിന്‍റോ ഓടുകയായിരുന്നു. ഇയാള്‍ കൈതച്ചിറയില്‍ എത്തിയെന്ന് ലഭിച്ച വിവരത്തി‍െന്‍റ അടിസ്ഥാനത്തില്‍ പൊലീസ് തിരച്ചില്‍ നടത്തിയെങ്കിലും കണ്ടെത്താനായില്ല.
