ചെന്നൈ: ഓക്സിജന് ക്ഷാമം രൂക്ഷമായി തുടരുന്ന സാഹചര്യത്തില്, തൂത്തുക്കുടിയിലെ അടച്ചുപൂട്ടിയ സ്റ്റെര്ലൈറ്റ് ഓക്സിജന് പ്ലാന്റ് തുറക്കാന് സാധ്യത. പ്ലാന്റ് തുറക്കുന്ന കാര്യം ചര്ച്ച ചെയ്യാന് തമിഴ്നാട് മുഖ്യമന്ത്രി എടപ്പാടി പളനിസ്വാമി സര്വകക്ഷിയോഗം വിളിച്ചു.
സ്റ്റെര്ലൈറ്റ് കോപ്പര് യൂണിറ്റ് ഏറ്റെടുക്കാനും കോവിഡ് രോഗികളെ ചികിത്സിക്കുന്നതിനായി പ്ലാന്റിന്റെ ഓക്സിജന് ഉല്പാദന ശേഷി ഉപയോഗിക്കാനും സുപ്രീം കോടതി സംസ്ഥാന സര്ക്കാരിനോട് നിര്ദ്ദേശിച്ചതിനെ തുടര്ന്നാണിത്. നേരത്തെ, പ്ലാന്റ് തുറക്കാത്തതില് സുപ്രീം കോടതി തമിഴ്നാട് സര്ക്കാരിനെ അതൃപ്തി അറിയിച്ചിരുന്നു. ഓക്സിജന് ക്ഷാമം മൂലം ജനങ്ങള് മരിച്ചുവീഴുമ്ബോള് പ്ലാന്റ് തുറക്കാന് അനുമതി നല്കാത്തത് അംഗീകരിക്കാനാവില്ലെന്നാണ് കോടതി നിരീക്ഷിച്ചത്.
ഇപ്പോളത്തെ സാഹചര്യത്തില് 1,050 ടണ് ഓക്സിജന് ഉത്പാദിപ്പിക്കാന് പ്ലാന്റിന് കഴിയുമെന്ന് സ്റ്റെര്ലൈറ്റ് മാനേജ്മെന്റ് സുപ്രീം കോടതിയെ അറിയിച്ചിരുന്നു. ഈ സാഹചര്യത്തിലാണ് സര്വകക്ഷിയോഗം വിളിക്കാന് സര്ക്കാര് തീരുമാനിച്ചത്.
2018ല് വേദാന്ത ഗ്രൂപ്പിന്റെ ഉടമസ്ഥതയിലുള്ള സ്റ്റെര്ലൈറ്റ് പ്ലാന്റ് പാരിസ്ഥിതിക പ്രശ്നങ്ങളെത്തുടര്ന്നാണ് അടച്ചുപൂട്ടിയത്. പ്ലാന്റ് പൂട്ടണമെന്നാവശ്യപ്പെട്ട് പ്രതിഷേധം നടത്തിയവര്ക്കെതിരേ നടത്തിയ പോലീസ് വെടിവയ്പ്പില് 13 പേര് കൊല്ലപ്പെടുകയും ചെയ്തിരുന്നു.
പ്ലാന്റ് വീണ്ടും തുറക്കുന്നത് പ്രതിഷേധങ്ങള്ക്ക് വഴിവയ്ക്കുമെന്ന ആശങ്കയും സര്ക്കാരിനു മുന്നിലുണ്ട്. ഇതും സര്വകക്ഷി യോഗത്തില് ചര്ച്ചയാകും.
