ന്യൂയോര്‍ക്: ദിവസങ്ങള്‍ക്കിടെ പലതവണ മുസ്ലിംകള്‍ക്കെതിരെ വംശവെറി ആക്രമണം നടത്തിയ യുവാവ് പൊലീസ് കസ്റ്റഡിയില്‍. യു.എസ് നഗരമായ ക്യൂന്‍സില്‍ അഞ്ചാഴ്ചക്കിടെ നിരവധി തവണ മുസ്ലിംകള്‍ക്കെതിരെ ആക്രമണം നടത്തിയതിന് 30കാരനായ നാവെദ് ദര്‍നിയാണ് പിടിയിലായത്. ജൂണ്‍ 20നാണ് ആദ്യ സംഭവം. ലിബര്‍ട്ടി അവന്യൂ, െലഫേര്‍ട്സ് ബൂള്‍വാര്‍ഡ് എന്നിവിടങ്ങളില്‍ ഒരു പുരുഷനെയും സ്ത്രീയെയും പിന്തുടര്‍ന്ന ഇയാള്‍ പുരുഷനെ ആക്രമിക്കുകയും സ്ത്രീയുടെ ഹിജാബ് വലിച്ചുകളഞ്ഞ് കൈയില്‍ ഇടിക്കുകയും ചെയ്തതായി പൊലീസ് പറഞ്ഞു. ഇരുവരുടെയും പരിക്ക് ഗുരുതരമല്ല. ഒരു മണിക്കൂറിന് ശേഷം ഇന്‍വുഡ് അവന്യൂവില്‍ സമാനമായി മറ്റൊരാളെയും ഒരു സ്ത്രീയെയും പിറകെ കൂടിയ ഇയാള്‍ മുസ്ലിം വെറി പരാമര്‍ശങ്ങള്‍ നടത്തുകയും സ്ത്രീയുടെ മുഖത്ത് പലവട്ടം ഇടിച്ച്‌ ഓടുകയായിരുന്നു. മൂക്കിനും മറ്റിടങ്ങളിലും പരിക്കേറ്റ ഇവര്‍ ആശുപത്രിയില്‍ ചികിത്സ തേടി.
ജൂലൈ 25ന് വീണ്ടും സമാന ആക്രമണം പ്രതിയെ കണ്ടെത്താന്‍ സഹായിക്കാനാവശ്യപ്പെട്ട് സി.സി.ടി.വി ദൃശ്യങ്ങള്‍ പൊലീസ് പുറത്തുവിട്ടിരുന്നു. അതിനു പിന്നാലെയാണ് അറസ്റ്റ്.
