കണ്ണൂര്‍: ലീഗ് പ്രവര്‍ത്തകന്‍ മന്‍സൂറിനെ കൊലപ്പെടുത്തിയ സംഭവത്തില്‍ പോലീസിന് നിര്‍ണായക വിവരങ്ങള്‍ ലഭിച്ചു. ഗൂഡാലോചന നടത്തിയത് വാട്‌സ്‌ആപ്പ് സന്ദേശങ്ങളിലൂടെയാണെന്ന് അന്വേഷണ സംഘം കണ്ടെത്തി. കേസില്‍ അറസ്റ്റിലായ ഷിനോസിന്‍റെ മൊബൈലില്‍ നിന്നുമാണ് ഈ വിവരങ്ങള്‍ ലഭിച്ചത്.
കൊല്ലപ്പെട്ട മന്‍സൂറിന്‍റെ സഹോദരന്‍ മുഹ്‌സിനെയാണ് പ്രതികള്‍ ലക്ഷ്യമിട്ടത്. മുഹ്‌സിന് പണികൊടുക്കണമെന്ന് വാട്സ്ആപ്പിലൂടെ സന്ദേശം അയച്ചിട്ടുണ്ട്. കൊലപാതകത്തിനുള്ള ആയുധങ്ങള്‍ ശേഖരിച്ചത് വാട്‌സ്‌ആപ്പ് സന്ദേശങ്ങളിലൂടെയാകാമെന്നാണ് നിഗമനം. ചില സന്ദേശങ്ങള്‍ ഡിലീറ്റ് ചെയ്ത നിലയിലാണ്. മൊബൈല്‍ ഫോണ്‍ സൈബര്‍ സെല്ലന് കൈമാറി. അതേസമയം, കേസില്‍ ഒളിവില്‍ കഴിയുന്ന 24 പ്രതികള്‍ക്കായി അന്വഷണം ശക്തമാക്കിയതായി പോലീസ് അറിയിച്ചു.
