ന്യൂഡല്ഹി: കോവിഡ് രണ്ടാം തരംഗം അതിവേഗം കുതിക്കുന്ന പുതിയ സാഹചര്യത്തില് രാജ്യത്ത് വീണ്ടും ലോക്ഡൗണ് പ്രഖ്യാപിച്ച് നടപടികള് ഊര്ജിതമാക്കാന് കേന്ദ്രത്തോടും സംസ്ഥാനങ്ങളോടും നിര്ദേശിച്ച് സുപ്രീം കോടതി. കോവിഡ് രണ്ടാം വ്യാപനം തടയാന് സര്ക്കാറുകള് സ്വീകരിച്ച നടപടി സംബന്ധിച്ച വിശദീകരണം ഉദ്യോഗസ്ഥരില്നിന്ന് കേട്ട ശേഷമായിരുന്നു കോടതിയുടെ നിരീക്ഷണം .
ജനക്കൂട്ടത്തിന്റെ ഒത്തുചേരലും മറ്റു പരിപാടികളും വിലക്കി സര്ക്കാറുകള് ഉത്തരവിറക്കണം. ഇതിന്റെ ഭാഗമായി പൊതുജന താല്പര്യാര്ഥം ലോക്ഡൗണും പ്രഖ്യാപിക്കണം. ലോക്ഡൗണില് കുടുങ്ങാനിടയുള്ള അവശ വിഭാഗങ്ങളുടെ സംരക്ഷണത്തിന് നടപടികളും സ്വീകരിക്കണമെന്ന് കോടതി ഉത്തരവില് ചൂണ്ടിക്കാട്ടുന്നു .
2020 മാര്ച്ചിലാണ് രാജ്യത്ത് ആദ്യമായി കോവിഡ് ലോക്ഡൗണ് പ്രഖ്യാപിക്കുന്നത്. ഇതിനെ തുടര്ന്ന് ലക്ഷക്കണക്കിന് ഇതര സംസ്ഥാന തൊഴിലാളികള് രാജ്യത്തിന്റെ പല ഭാഗങ്ങളില് കുടുങ്ങിയിരുന്നു.
അതെ സമയം കഴിഞ്ഞ 24 മണിക്കൂറിനിടെ രാജ്യത്ത് 3.92 ലക്ഷം പേരിലാണ് പുതുതായി കോവിഡ് സ്ഥിരീകരിക്കുന്നത്. 3,689 മരണങ്ങളും റിപ്പോര്ട്ട് ചെയ്തു . രാജ്യത്ത് രോഗവ്യാപനം കൂടുതലുള്ള പല സംസ്ഥാനങ്ങളും കര്ശന നിയന്ത്രണങ്ങള് ഏര്പ്പെടുത്തിയിട്ടുണ്ട് .