ലോസ് ആഞ്ചലസ്: യു.എസില്‍ രണ്ടുപേര്‍ക്ക് കൂടി കോവിഡ് 19 റിപ്പോര്‍ട്ട് െചയ്തു. ഇതോടെ രാജ്യത്ത് കൊറോണ ബാധിച്ചവരുടെ എണ്ണം നാലായി. വാഷിങ്ടണിലും ഒറിഗോണിലുമാണ് പുതിയ കൊറോണ ബാധ റിപ്പോര്‍ട്ട് ചെയ്തത്. നേരത്തെ കാലിഫോര്‍ണിയയില്‍ രണ്ടുപേര്‍ക്ക് കൊറോണ സ്ഥിരീകരിച്ചിരുന്നു.
വാഷിങ്ടണില്‍ പ്രായപൂര്‍ത്തിയാവാത്ത കുട്ടിക്കാണ് വെള്ളിയാഴ്ച കൊറോണ സ്ഥിരീകരിച്ചതെന്നാണ് വിവരം. കൂടുതല്‍ വിവരങ്ങള്‍ പുറത്തുവിട്ടിട്ടില്ല. കുട്ടി വീട്ടിനുള്ളില്‍ നീരീക്ഷണത്തിലാണ്. കുട്ടി പഠിച്ചിരുന്ന സ്കൂള്‍ അണുവിമുക്തമാക്കുന്നതിന്‍െറ ഭാഗമായി മാര്‍ച്ച്‌ മൂന്നുവരെ അടച്ചിട്ടതായും വാഷിങ്ടണ്‍ ആരോഗ്യ വിഭാഗം അറിയിച്ചു.
ഒറിഗോണിലും കഴിഞ്ഞ ദിവസം ഒരു വിദ്യാര്‍ഥിക്ക് കൊറോണ ബാധിച്ചതായി റിപ്പോര്‍ട്ട് ചെയ്തു. വിദ്യാര്‍ഥിയെ ആശുപത്രിയില്‍ പ്രവേശിപ്പിച്ചിരിക്കുകയാണ്. കൊറോണയെ നേരിടാന്‍ തങ്ങള്‍ ജാഗ്രത പാലിക്കുന്നുണ്ടെന്നും ഒറിഗോണ്‍ ആരോഗ്യ മന്ത്രാലയം അറിയിച്ചു. ഇതേതുടര്‍ന്ന് വിദ്യാര്‍ഥി പഠിക്കുന്ന സ്കൂള്‍ മാര്‍ച്ച്‌ നാലുവരെ അണുവിമുക്തമാക്കുന്നതിന് അടച്ചിട്ടു.
നേരത്തേ കാലിഫോര്‍ണിയയില്‍ കൊറോണ ബാധ റിപ്പോര്‍ട്ട് ചെയ്തിരുന്നു. യു.എസിലെ കൊറോണ ബാധയുടെ ഉറവിടം കണ്ടെത്താന്‍ അധികൃതര്‍ക്ക് ഇതുവരെ സാധിച്ചിട്ടില്ല. കൊറോണ നേരത്തേ സ്ഥിരീകരിച്ച കാലിഫോര്‍ണിയയുടെ തൊട്ടടുത്താണ് ആപ്പിള്‍, ഗൂഗ്ള്‍, ടെസ്ല എന്നിവയുടെ ആസ്ഥനമായ സിലിക്കണ്‍ വാലി. ഉറവിടം കണ്ടെത്താത്തതും കൂടുതല്‍ പേരിലേക്ക് രോഗം പടരുന്നതും അധികൃതരില്‍ ആശങ്ക ഉയര്‍ത്തുന്നുണ്ട്.
