കണ്ണൂര്: ( 01.02.2020) ചൈനാസന്ദര്ശനം കഴിഞ്ഞ് തിരിച്ചെത്തിയ ഒരാളെ കൊറോണ വൈറസ് ബാധയെന്ന സംശയത്തില് പരിയാരത്തുള്ള കണ്ണൂര് ഗവ. മെഡിക്കല് കോളേജില് പ്രവേശിപ്പിച്ചു. വെള്ളിയാഴ്ച വൈകീട്ട് ആറുമണിയോടെയാണ് ഇദ്ദേഹത്തെ മെഡിക്കല് കോളേജാശുപത്രിയിലെത്തിച്ചത്. കഴിഞ്ഞദിവസം ചൈനയില് നിന്നെത്തിയ ഇദ്ദേഹത്തിന് തൊണ്ടവേദന, ചുമ, പനി തുടങ്ങിയ ലക്ഷണങ്ങള് കണ്ടതിനെത്തുടര്ന്നാണ് മെഡിക്കല് കോളേജിലെത്തിച്ചത്.
പ്രത്യേക സൗകര്യങ്ങളോടെ തയ്യാറാക്കിയ ഐസലേഷന് വാര്ഡിലാണ് ഇദ്ദേഹത്തെ പാര്പ്പിച്ചിരിക്കുന്നത്. നിരീക്ഷണത്തിനായാണ് ചൈനയില് നിന്നെത്തിയ ആളെ മെഡിക്കല് കോളേജ് ആശുപത്രിയില് പ്രവേശിപ്പിച്ചതെന്നും ആശങ്കകള്ക്കിടയില്ലെന്നും ആര് എം ഒ ഡോ. എം സരിന് പറഞ്ഞു.
