ബെയ്ജിങ്: ജപ്പാന്‍ നിര്‍മിച്ച ഫാവിപിരവിര്‍ (favipiravir) എന്ന പനിക്കുള്ള മരുന്ന് കോവിഡ് 19 ചികിത്സക്ക് ഫലപ്രദമാണെന്ന് കണ്ടെത്തിയതായി ചൈനയിലെ ആരോഗ്യ വിദഗ്ധര്‍. ഫാവിപിരവിര്‍ ഘടകമടങ്ങിയ മരുന്നായ (anti-flu agent) അവിഗാന്‍ (avigan) ആണ് 300ഓളം കോവിഡ് ബാധിതരില്‍ വിജയകരമായി പരീക്ഷിച്ചതെന്ന് ചൈന അവകാശപ്പെടുന്നു.
ഈ മരുന്ന് പരീക്ഷിച്ച രോഗികളില്‍ പെട്ടെന്ന് രോഗമുക്തി കണ്ടതായാണ് റിപ്പോര്‍ട്ട്. രോഗികളുടെ ശ്വാസകോശ സംബന്ധമായ പ്രശ്നങ്ങളും ഫാവിപിരവിര്‍ പരീക്ഷിച്ചവരില്‍ മെച്ചപ്പെട്ടത്രേ. അവിഗാനിലെ ഫാവിപിരാവിര്‍ എന്ന ഘടകം വൈറസ് ശരീരത്തില്‍ വ്യാപിക്കുന്നതിനെ തടയുമെന്നും ചൈനയിലെ വൈദ്യശാസ്ത്ര വിദഗ്ധര്‍ സാക്ഷ്യപ്പെടുത്തുന്നുണ്ട്. മരുന്നിന് പാര്‍ശ്വ ഫലങ്ങളില്ലെന്ന് ചൈനയിലെ സയന്‍സ് ആന്‍ഡ് ടെക്നോളജി മന്ത്രാലയവും അഭിപ്രായപ്പെട്ടു.
ഹോങ്കോങ് കേന്ദ്രമാക്കി പ്രവര്‍ത്തിക്കുന്ന സിഹ്വാന്‍ ഫാര്‍മസ്യൂട്ടിക്കല്‍സും ഫാവിപിരവിര്‍ ഉപയോഗിച്ചുള്ള മരുന്ന് കോവിഡ് ബാധിതരില്‍ പരീക്ഷിക്കാനുള്ള ഒരുക്കത്തിലാണ്. ചൈനയില്‍ വൈറസിനെ പ്രതിരോധിക്കാനുള്ള വാക്സിന്‍ നിര്‍മാണത്തിനുള്ള ഒരുക്കവും തകൃതിയായി നടക്കുന്നുണ്ട്.
