കൊയ്റോ: പൊതുവേദിയില്‍ സുതാര്യമായ വസ്ത്രം ധരിച്ചെത്തിയ നടിയ്ക്ക് കിട്ടിയത് എട്ടിന്‍റെ പണി. രാജ്യത്തെ നാണം കെടുത്തുന്ന തരത്തിലുളള വസ്ത്രം ധരിച്ചതിന് നടി റാണിയ യൂസഫിനെതിരെ നിയമ നടപടിയ്ക്കൊരുങ്ങുകയാണ് . അഭിഭാഷകരാണ് ചീഫ് പ്രോസിക്യൂട്ടര്‍ക്ക് പരാതി നല്‍കിയത്. കേസില്‍ കുറ്റക്കാരിയാണെന്ന് കണ്ടെത്തിയാല്‍ അ‍ഞ്ച് വര്‍ഷം വരെ തടവ് ലഭിക്കും.
കൊയ്റോ ഫിലിം ഫെസ്റ്റിവലിനാണ് കറുത്ത നിറത്തിലുളള ശരീരത്തോട് ഒട്ടിച്ചേര്‍ന്നുകിടക്കുന്ന വസ്ത്രം ധരിച്ച്‌ റാണിയ എത്തിയത്. എന്നാല്‍ സംഭവം വിവാദമായതോടെ മാപ്പ് ചോദിച്ചു നടി രംഗത്തെത്തിയിരുന്നു. ഇതാദ്യമായിട്ടാണ് ഇത്തരത്തിലുളള വസ്ത്രം ധരിക്കുന്നതെന്നും രാജ്യത്ത് ഇത്തരത്തിലുളള പ്രശ്നമുണ്ടെന്ന് അറിഞ്ഞിരുന്നെങ്കില്‍ ധരിക്കില്ലായിരുന്നെന്നും താരം പറഞ്ഞു.
എന്നാല്‍ ഈജിപ്തില്‍ ഇതാദ്യമായിട്ടല്ല ഇത്തരത്തിലുളള സംഭവം നടക്കുന്നത്. കഴിഞ്ഞ വര്‍ഷം പാട്ട് രംഗത്തിനിടെ അശ്ലീല ചുവയോടെ വാഴപ്പഴം കടിച്ചതില്‍ ഈജ്പ്ഷ്യന്‍ ഗായിക ഷൈമ അഹ്മദിനെതിരെ നിയമ നടപടി സ്വീകരിച്ചിരുന്നു. രണ്ട് വര്‍ഷം തടവിനായിരുന്നു ശിക്ഷിച്ചത്. പിന്നീട് ഇത് ഒരു വര്‍ഷമാക്കി.
സംഗീത ആല്‍ബത്തില്‍ നൃത്തംചെയ്യുന്നരംഗങ്ങള്‍ ഉള്‍പ്പെടുത്തിയെന്നും സഭ്യത ലംഘിക്കുന്ന ചേഷ്ടകള്‍ കാണിച്ചുവെന്നും ആരോപിച്ച്‌ മറ്റൊരുഗായികയ്ക്കെതിരെയും കേസെടുത്തിരുന്നു. പുസ്തകത്തില്‍ അശ്ലീലത, മയക്കുമരുന്ന് എന്നിവയെക്കുറിച്ച്‌ പറഞ്ഞതിന് 2106ല്‍ ഒരു എഴുത്തുകാരനെയും ഇൗജിപ്തില്‍ തടവിലാക്കിയിരുന്നു. മനുഷ്യാവകാശപ്രവര്‍ത്തകരും വിദേശ എഴുത്തുകാരുമുള്‍പ്പെടെ ശക്തമായ സ്വാധീനം ചെലുത്തിയതോടെ ഇദ്ദേഹത്തെ വിട്ടയച്ചു.
