അമരാവതി: ആന്ധ്രപ്രദേശിലെ പ്രകാശം ജില്ലയില് സാനിറ്റൈസര് കുടിച്ച് ഒമ്ബത് പേര് മരിച്ചു. ദിവസങ്ങളായി വെള്ളത്തിനും സോഫ്റ്റ് ഡ്രിങ്ക്സിനുമൊപ്പം ചേര്ത്ത് സാനിറ്റൈസര് കുടിച്ച ഒമ്ബത് പേരാണ് മരിച്ചെതന്ന് ജില്ലാ പൊലീസ് സുപ്രണ്ട് സിദ്ധാര്ഥ് കൗശല് പറഞ്ഞു. സാനിറ്റൈസറിനൊപ്പം മറ്റ് വല്ല പദാര്ഥങ്ങളും കലര്ത്തിയിട്ടുണ്ടോയെന്നതും പരിശോധിച്ച് വരികയാണെന്ന് അദ്ദേഹം അറിയിച്ചു.
കഴിഞ്ഞ 10 ദിവസമായി ഇവര് സാനിറ്റൈസര് ഉപയോഗിച്ചിരുന്നുവെന്ന് കുടുംബാംഗങ്ങള് പറഞ്ഞതായി പൊലീസ് അറിയിച്ചു. പ്രദേശത്ത് സാനിറ്റൈസര് വലിയ രീതിയില് വിറ്റുപോയിട്ടുണ്ട്. ലോക്ഡൗണിനെ തുടര്ന്ന് മദ്യഷോപ്പുകള് അടച്ചതോടെയാണ് പകരം സാനിറ്റൈസര് ജനങ്ങള് ഉപയോഗിച്ച് തുടങ്ങിയതെന്ന് പൊലീസ് അറിയിച്ചു.
ഗ്രാമത്തിലെ ക്ഷേത്രത്തിനടുത്തുണ്ടായിരുന്ന രണ്ട് ഭിക്ഷാടകര് വ്യാഴാഴ്ച കുഴഞ്ഞു വീണതോടെയാണ് സംഭവം പുറത്തറിയുന്നത്. തുടര്ന്ന് ഇവരെ ആശുപത്രിയില് പ്രവേശിപ്പിച്ചെങ്കിലും ജീവന് രക്ഷിക്കാനായില്ല. സമാനലക്ഷണങ്ങളുമായി ആശുപത്രിയില് പ്രവേശിക്കപ്പെട്ട ഏഴ് പേര് കൂടി വെള്ളിയാഴ്ച രാവിലെ മരിക്കുകയായിരുന്നു