ന്യൂഡല്‍ഹി: സെന്‍ട്രല്‍ ഡല്‍ഹിയിലെ ഹോട്ടലില്‍ തീപിടുത്തത്തില്‍ മരിച്ചവരുടെ എണ്ണം 17 ആയി. ഇതില്‍ മൂന്നു പേര്‍ മലയാളികളാണെന്ന് സ്ഥിരീകരിച്ചു. കൊച്ചി ചോറ്റാനിക്കര എരുവേലി സ്വദേശി ജയശ്രീ (53), ഇവരുടെ അമ്മ നളിനിയമ്മ, ബന്ധു വിദ്യാസാഘര്‍ എന്നിവരാണ് മരിച്ചത്.
അപകടത്തിനു ശേഷം നളിനിയമ്മയേയും വിദ്യാസാഘറിനെയും സംബന്ധിച്ച്‌ വിവരമില്ലായിരുന്നു. ഇവരുടെ ബന്ധുക്കള്‍ ആശുപത്രിയില്‍ എത്തിയാണ് നളിനിയമ്മയുടേയും വിദ്യാസാഘറിന്‍റെയും മരണം സ്ഥിരീകരിച്ചത്. അപകടത്തിനു ശേഷം മരിച്ചവരെയും പരിക്കേറ്റവരെയും ആശുപത്രിയിലേക്ക് മാറ്റിയിരുന്നു.
നളിനയമ്മയുടെ മറ്റൊരു മകളുടെ മകളുടെ കല്യാണത്തിനായാണ് മലയാളി സംഘം ഡല്‍ഹിയില്‍ എത്തിയത്. ഗാസിയാബാദിലായിരുന്നു വിവാഹ ചടങ്ങുകള്‍. ഏഴാം തീയതിയാണ് ഇവര്‍ കേരളത്തില്‍നിന്നും ഡല്‍ഹിക്ക് പുറപ്പെട്ടത്. വിവാഹത്തിനു ശേഷം താജ്മഹല്‍ ഉള്‍പ്പെടെ സന്ദര്‍ശിച്ച സംഘം ചൊവ്വാഴ്ച ഹരിദ്വാറിലേക്ക് പോകാന്‍ തയാറെടുക്കുന്നതിനിടെയാണ് അപകടം. അഞ്ച് നിലയിലുള്ള ഹോട്ടല്‍ കെട്ടിടത്തിന്‍റെ രണ്ടാം നിലയിലായിരുന്നു മലയാളി സംഘം ഉണ്ടായിരുന്നത്.
ചൊവ്വാഴ്ച പുലര്‍ച്ചെ നാലിന് കരോള്‍ബാഗിലെ അര്‍പ്പിത് പാലസ് ഹോട്ടലിലാണ് തീപിടുത്തമുണ്ടായത്. പുലര്‍ച്ചെ ആയതിനാല്‍ എല്ലാവരും ഉറക്കത്തിലായിരുന്നു. അതുകൊണ്ട് തന്നെ രക്ഷപെടാന്‍ പലര്‍ക്കും സാധിച്ചില്ല. നിമിഷനേരം കൊണ്ട് തീ ആളിപ്പടരുകയും ചെയ്തു. രാവിലെ ഏഴോടെയാണ് തീ നിയന്ത്രണ വിധേയമാക്കാന്‍ സാധിച്ചത്. ഇരുപതോളം ഫയര്‍ എന്‍ജിനുകള്‍ സ്ഥലത്തെത്തിയാണ് തീ നിയന്ത്രണ വിധേയമാക്കിയത്.
