തിരുവല്ല: യുവതിയെ ലൈംഗിക ചൂഷണത്തിന് ഇരയാക്കിയെന്ന വിവാദത്തില് ആരോപണ വിധേയരായ ഓര്ത്തഡോക്സ് സഭയിലെ നാലു വൈദികര്ക്കെതിരേ ക്രൈംബ്രാഞ്ച് കേസെടുത്തു. നിരണം ഭദ്രാസനത്തിലെ കുന്നന്താനം മുണ്ടിയപ്പള്ളി പൂത്തോട്ടില് ഫാ. എബ്രഹാം വര്ഗീസ് (സോണി), കറുകച്ചാല് കരുണഗിരി എം.ജി.ഡി. ആശ്രമാംഗം ഫാ. ജോബ് മാത്യു, തുമ്ബമണ് ഭദ്രാസനത്തിലെ കോഴഞ്ചേരി തെക്കേമല മണ്ണില് ഫാ. ജോണ്സണ് വി. മാത്യു, ഡല്ഹി ഭദ്രാസനത്തിലെ ഫാ. ജെയ്സ് കെ. ജോര്ജ് എന്നിവര്ക്കെതിരേയാണ് കേസെടുത്തത്.
കുമ്പസാര രഹസ്യം പരസ്യമാക്കുമെന്ന് ഭീഷണിപ്പെടുത്തി പീഡിപ്പിച്ച ഫാ. ജോബ് മാത്യുവാണ് ഒന്നാം പ്രതി. മല്ലപ്പള്ളി സ്വദേശിയായ ഭര്ത്താവ് സഭയ്ക്കു പരാതി നല്കിയതോടെയാണു സംഭവം പുറത്തറിഞ്ഞത്. എന്നാല്, യുവതിയുടെ വിശദമായ മൊഴി ശേഖരിച്ച ക്രൈംബ്രാഞ്ച് ഇവ വിശകലനം ചെയ്തശേഷം നാലുപേരെ മാത്രം പ്രതികളാക്കുകയായിരുന്നു. തിരുവനന്തപുരം ക്രൈംബ്രാഞ്ച് ആസ്ഥാനത്താണ് കേസ് രജിസ്റ്റര് ചെയ്തത്. അറസ്റ്റ് ഉടന് ഉണ്ടായേക്കും.
നാലുപേര്ക്കെതിരേയും ബലാത്സംഗം, ഭീഷണപ്പെടുത്തി ലൈംഗിക ബന്ധം, സ്ത്രീത്വത്തെ അപമാനിക്കല് എന്നി വകുപ്പുകള് ചുമത്തി. ജീവപര്യന്തം തടവുവരെ ലഭിക്കാവുന്ന കുറ്റങ്ങളാണിത്.