അസാധാരണ നടപടിയുമായി ഹൈക്കോടതി. അഡ്വക്കേറ്റ് സൈബി ജോസ് ഹാജരായ കേസില് പ്രതികളുടെ ജാമ്യ ഉത്തരവ് ഹൈക്കോടതി തിരിച്ച് വിളിച്ചു.
ഇരയുടെ ഭാഗം കേള്ക്കാതെ പ്രതികള്ക്ക് ജാമ്യം നല്കിയതില് വീഴ്ച പറ്റിയെന്ന വിലയിരുത്തിയാണ് ജസ്റ്റിസ് സിയാദ് റഹ്മാന്റെ നടപടി. നോട്ടിസ് ലഭിച്ചിട്ടും ഇര ഹാജരായില്ല എന്നായിരുന്നു കോടതിയെ ധരിപ്പിച്ചത്.
അനുകൂല വിധി വാങ്ങി നല്കാം എന്ന് കക്ഷികളെ ധരിപ്പിച്ച് ജസ്റ്റിസ് സിയാദ് റഹ്മാന് അടക്കം 3 ജഡ്ജിമാരുടെ പേരില് അഭിഭാഷകനായ സൈബി ജോസ് കൈക്കൂലി വാങ്ങിയ സംഭവത്തില് പൊലീസ് അന്വേഷണം നടക്കുന്നതിനിടയിലാണ് പത്തനംതിട്ട സ്വദേശി ബാബുവിന്റെ ഹര്ജിയില് ഹൈക്കോടതിയില് അസാധാരണ നടപടി.
റാന്നി പൊലീസ് എടുത്ത കേസില് പ്രതികളായ ബൈജു സെബാസ്റ്റ്യന്, ജിജോ വര്ഗീസ് എന്നീവര്ക്ക് ജാമ്യം നല്കിയത് ഇരയായ തന്ടെ വാദം കേള്ക്കാതെ ആണെന്നായിരുന്നു പരാതി. പ്രതികള്ക്ക് വേണ്ടി സൈബി ജോസ് കിടങ്ങൂര് ആയിരുന്നു അന്ന് ഹാജരായതെന്നും നോട്ടിസ് ലഭിക്കാത്തത് സംശയാസ്പദമാണെന്നും കോടതി അറിയിച്ചു.
തുടര്ന്നാണ് ജസ്റ്റിസ് സിയാദ് റഹ്മാന് 2022 ഏപ്രില് 29 ല് താന് പുറപ്പെടുവിച്ച ഉത്തരവ് പുനപരിശോധിച്ചത്. പ്രതികളുടെ ജാമ്യ ഹര്ജി വന്നതിന് പിന്നാലെ വാദി ഭാഗത്തിന് നോട്ടീസ് നല്കാന് കോടതി ഉത്തരവിട്ടിരുന്നു. റാന്നി എസ് എച്ച് ഒയ്ക്ക് ആയിരുന്നു നിര്ദേശം. എന്നാല് കേസ് പരിഗണിച്ചപ്പോള് ഇരയുടെ വാദത്തിനായി അഭിഭാഷകര് ഉണ്ടായിരുന്നില്ല. കോടതി ഇക്കാര്യം ആരാഞ്ഞപ്പോള് നോട്ടിസ് നല്കിയിരുന്നു എന്നായിരുന്നു പ്രോസിക്യൂഷന് മറുപടി. എന്നാല് നോട്ടിസ് നല്കിയിരുന്നില്ല എന്ന് കോടതിക്ക് ബോധ്യമായി. തുടര്ന്നാണ് CRPC 482 പ്രകാരം മുന് ഉത്തരവ് തിരിച്ചു വിളിക്കുന്നതായി ജസ്റ്റ്. സിയാദ് റഹ്മാന് അറിയിച്ചത്.