തിരുവനന്തപുരം: ജില്ലയില് 24 മണിക്കൂറില് 64.5 മുതല് 115.5 മി.മീ വരെയുള്ള ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
കഴിഞ്ഞ ദിവസങ്ങളില് വലിയ അളവില് മഴ ലഭിച്ച പ്രദേശങ്ങളില് മഴ തുടരുന്ന സാഹചര്യത്തില് താഴ്ന്ന പ്രദേശങ്ങള്, നദീതീരങ്ങള്, ഉരുള്പൊട്ടല്, മണ്ണിടിച്ചില് സാധ്യതയുള്ള മലയോരപ്രദേശങ്ങള് തുടങ്ങിയ ഇടങ്ങളിലുള്ളവര് അതീവ ജാഗ്രത പാലിക്കണമെന്നും അറിയിപ്പില് പറയുന്നു. ഈ ദിവസങ്ങളില് ജില്ലയില് യെല്ലോ അലര്ട്ട് പ്രഖ്യാപിച്ചതായി ജില്ലാ കളക്ടര് അറിയിച്ചു.
മുന് വര്ഷങ്ങളില് ഉരുള്പൊട്ടല്, മണ്ണിടിച്ചില്, വെള്ളപ്പൊക്കം എന്നിവ ഉണ്ടായ മേഖലകളിലുള്ളവര്, ജിയോളജിക്കല് സര്വേ ഓഫ് ഇന്ത്യയും സംസ്ഥാന ദുരന്ത നിവാരണ അതോറിറ്റിയുടെ വിദഗ്ധ സമിതിയും അപകട സാധ്യത മേഖലകളായി കണ്ടെത്തിയ സ്ഥലങ്ങളില് താമസിക്കുന്നവരും പ്രദേശങ്ങളിലെ തദ്ദേശ സ്ഥാപനങ്ങളും സര്ക്കാര് സംവിധാനങ്ങളും അപകട സാധ്യത മുന്നില് കണ്ട് തയ്യാറെടുപ്പുകള് പൂര്ത്തീകരിക്കേണ്ടതാണെന്നും അറിയിപ്പില് പറയുന്നു.
