വിക്രം നായകനായി എത്തുന്ന സാമി ടു റിലീസിന് ഒരുങ്ങുകയാണ്. ചിത്രത്തിന്‍റെ ടീസര്‍ അടുത്തിടെ പുറത്ത് വന്നിരുന്നു. സമ്മിശ്ര പ്രതികരണമാണ് ടീസറിന് ലഭിച്ചുകൊണ്ടിരിക്കുന്നത്. അതിനിടെയാണ് നടി കസ്തൂരിയുടെ രംഗ പ്രവേശം. സാമി 2 വിന്‍റെ ടീസറിനെ കളിയാക്കിയാണ് കസ്തൂരി എത്തിയത്.
സാമിയുടെ ടീസറിന് താന്‍ അഭിനയിച്ച ചിത്രമായ തമിഴ് പടം 2 എന്ന പുതിയ ചിത്രത്തിന്‍റെ ടീസറുമായി ബന്ധമുണ്ടെന്നും വെറും ടെംപ്ലേറ്റ് ഷോട്ടുകള്‍ നിരത്തിയാണ് സാമി 2 വിന്‍റെ ടീസര്‍ ഒരുക്കിയിട്ടുള്ളതുമെന്നും കസ്തൂരി ട്വീറ്റ് ചെയ്തു.
ഇത് കണ്ട് രോഷാകുലരായ വിക്രത്തിന്‍റെ ആരാധകര്‍ കിളവിയായിട്ടും ഐറ്റം ഡാന്‍സ് കളിച്ചുനടക്കാന്‍ നാണമില്ലേയെന്ന് കസ്തൂരിയെ തിരിച്ചും ട്രോളി. തമിഴ് പടം 2 വില്‍ കസ്തൂരി ഒരു ഐറ്റം ഡാന്‍സ് അവതരിപ്പിക്കുന്നുണ്ട്. ഇതിനെയാണ് ആരാധകര്‍ ചോദ്യം ചെയ്തത്.
ഇതുകേട്ട കസ്തൂരി അതേ നാണയത്തില്‍ വിക്രം ഫാന്‍സിനെയും വിക്രത്തെയും പിന്നെയും ട്രോളി. മകളുടെ പ്രായം വരുന്ന നടിമാര്‍ക്കൊപ്പം അഭിനയിക്കാന്‍ വിക്രത്തിന് പറ്റുമെങ്കില്‍ ഈ പ്രായത്തില്‍ എനിക്ക് എന്തുകൊണ്ട് ഐറ്റം ഡാന്‍സ് ചെയ്തൂടായെന്നായിരുന്നു കസ്തൂരിയുടെ ചോദ്യം.
കസ്തൂരിയുടെ ട്വീറ്റുകള്‍ തന്നെയാണ് തമിഴകത്തെ ഇന്നത്തെ ചര്‍ച്ചാവിഷയം. കസ്തൂരിയുടെ പുതിയ ചിത്രത്തെ വിക്രം ഫാന്‍സ് കൂക്കിത്തോല്‍പ്പിക്കുമോ എന്ന് കാത്തിരുന്നുതന്നെ കാണാം. എന്നാല്‍ കസ്തൂരിയുടെ ട്വീറ്റിനോട് വിക്രം ഇതുവരെ പ്രതികരിച്ചിട്ടില്ല.
