ലിമ: പെറുവില് പാറിയിടുക്കിലേക്ക് ബസ് മറിഞ്ഞ് 48 പേര് തല്ക്ഷണം മരിച്ചു. രണ്ട് ജീവനക്കാരും 55 യാത്രക്കാരുമാണ് ബസിലുണ്ടായിരുന്നത്. ട്രാക്ടറുമായി കൂട്ടിയിടിച്ചാണ് ബസ് അപകടത്തില് പെട്ടതെന്നാണ് റിപ്പോര്ട്ട്.
ഹൗക്കോയില് നിന്ന് പെറു തലസ്ഥാനമായ ലിമയിലേക്ക് വരികയായിരുന്ന ബസാണ് മുന്നൂറടി താഴ്ച്ചയുള്ള പാറയിടുക്കിലേക്ക് മറിഞ്ഞത്. ‘പിശാചിന്റെ വളവ്’ എന്നറിയപ്പെടുന്ന സ്ഥലത്താണ് അപകടമുണ്ടായതെന്ന് പെറു പൊലീസ് പറഞ്ഞു. വ്യോമസേനയുടെ ഹെലികോപ്ടര് സ്ഥലത്തെത്തിച്ചാണ് മൃതദേഹങ്ങള് അപകട സ്ഥലത്ത് നിന്ന് നീക്കം ചെയ്തത്.
പരിക്കേറ്റവരില് അഞ്ചു പേരുടെ നില ഗുരുതരമാണ്. ലിമയില് നിന്ന് 45 കിലോമീറ്റര് അകലെയാണ് ദുരന്തം നടന്ന സ്ഥലം. കടലിനോട് ചേര്ന്ന് കിടക്കുന്ന പാറയിടുക്കിന് 100 മീറ്റര് താഴ്ചയുണ്ട്. അപകടം രാത്രി നടന്നതിനാല് രക്ഷാപ്രവര്ത്തനം ഏറെ ബുദ്ധിമുട്ടുള്ളതായിരുന്നുവെന്ന് പൊലീസ് അറിയിച്ചു.
അപകടം മുന്നില്കണ്ട് ഇതുവഴി ബസുകള്ക്കും ട്രക്കുകള്ക്കും മാത്രമാണ് യാത്രാനുമതിയുള്ളത്. കാറുകള് മറ്റു റൂട്ടിലൂടെയാണ് സഞ്ചരിക്കാറുള്ളത്. ഇവിടേക്ക് എത്തിച്ചേരാന് ഈ ഒരു റോഡ് മാത്രമേ ഉള്ളു.
