ന്യൂഡല്‍ഹി: മ്യാന്‍മറില്‍ നിന്നും അതിര്‍ത്തി കടന്ന് മൂന്ന് പേര്‍ ഇന്ത്യയിലെത്തിയതായി റിപ്പോര്‍ട്ട് . പോലീസ് ഉദ്യോഗസ്ഥരെന്ന് അവകാശപ്പെട്ട മൂന്നുപേരാണ് മിസോറാമിലെ സെര്‍ചിപ്പ് ജില്ലയില്‍ പ്രവേശിച്ചത് . പട്ടാള ഭരണത്തിനെതിരെ പ്രക്ഷോഭം തുടങ്ങിയ ശേഷം ഇതാദ്യമായാണ് മ്യാന്‍മറില്‍ നിന്നും പൗരന്മാര്‍ രാജ്യത്തെത്തുന്നത് .
മൂന്ന് പേര്‍ മ്യാന്‍മറിന്‍റെ അതിര്‍ത്തിയിലുള്ള സെര്‍ച്ചിപ്പ് ജില്ലയിലേക്ക് ബുധനാഴ്ച പ്രവേശിച്ചതായി മിസോറം ആഭ്യന്തരമന്ത്രി ലാല്‍ചാംലിയാന സ്ഥിരീകരിച്ചു. പോലീസുദ്യോഗസ്ഥരാണെന്ന് അവകാശപ്പെടുന്ന ഇവരെക്കുറിച്ചുള്ള വിവരങ്ങള്‍ അന്വേഷിക്കാന്‍ ഉദ്യോഗസ്ഥരെ അയച്ചിട്ടുണ്ടെന്നും അദ്ദേഹം പറഞ്ഞു .
അതെ സമയം ഇന്ത്യയില്‍ പ്രവേശിക്കുന്നവര്‍ക്ക് അഭയാര്‍ത്ഥി പദവി നല്‍കുമെങ്കിലും സര്‍ക്കാരിന്‍റെ തീരുമാനം ഇതിനെതിരെയാണെങ്കില്‍ അവരെ നാടുകടത്തും. മ്യാന്‍മറില്‍ പട്ടാള ഭരണത്തിനെതിരെ വലിയ പ്രക്ഷോഭമാണ് അരങ്ങേറുന്നത് . അതെ സമയം കഴിഞ്ഞ ദിവസം നിരവധി പ്രതിഷേധക്കാരെ പട്ടാളം വെടിവച്ചു കൊലപ്പെടുത്തിയിരുന്നു.
