മുഴപ്പിലങ്ങാട്: കുടുംബശ്രീ ഫണ്ട് വെട്ടിച്ചെന്ന ആരോപണത്തെ തുടര്ന്ന് സി.പി.എം പാര്ട്ടിചിഹ്നത്തില് മത്സരിച്ച് വിജയിച്ച മുഴപ്പിലങ്ങാട് പഞ്ചായത്ത് ആറാം വാര്ഡംഗം കെ.പി.
രാജമണി സ്ഥാനം രാജിവെച്ചു. വ്യാഴാഴ്ച പത്തോടെ പഞ്ചായത്ത് ഓഫിസിലെത്തി ഇവര് സെക്രട്ടറിക്ക് രാജിക്കത്ത് നല്കുകയായിരുന്നു.
തീരദേശ വികസനത്തിനായി പിന്നാക്ക വികസന കോര്പറേഷന് അനുവദിച്ച ഏഴുലക്ഷം രൂപ ഭാരവാഹികളോ അംഗങ്ങളോ അറിയാതെ ഇവര് പിന്വലിച്ചതായി ഡി.സി.എസ് ഭാരവാഹികള് കഴിഞ്ഞദിവസം പൊലീസിലും വിജിലന്സിലും പരാതി നല്കിയിരുന്നു. രാജിവെച്ചെങ്കിലും പരാതിയുമായി ബന്ധപ്പെട്ട അന്വേഷണം നേരിടേണ്ടിവരുമെന്നാണ് സൂചന.
ഇതിനിടെ സി.പി.എം എടക്കാട് ഏരിയയില് മുഴപ്പിലങ്ങാട് കടവ് ബ്രാഞ്ച് അംഗമായ രാജമണിയെ പാര്ട്ടിയില്നിന്ന് പുറത്താക്കിയതായി ജില്ല കമ്മിറ്റി അറിയിച്ചു. പാര്ട്ടിയുടെ യശസ്സിന് കളങ്കംവരുത്തുന്ന വിധത്തില് പ്രവര്ത്തിച്ചതിനാല് പാര്ട്ടിയില്നിന്ന് പുറത്താക്കിയതായാണ് ജില്ല കമ്മിറ്റിയുടെ വിശദീകരണം.
ഇവര് രാജിവെച്ചതോടെ മുഴപ്പിലങ്ങാട് പഞ്ചായത്ത് ഭരണം ത്രിശങ്കുവിലായി. നിലവില് 15 അംഗ ഭരണസമിതിയില് സി.പി.എമ്മിെന്റ ഒരാള് രാജിവെച്ചതോടെ സി.പി.എം -5, യു.ഡി.എഫ് -5, എസ്.ഡി.പി.ഐ -4 എന്നിങ്ങനെയാണ് കക്ഷി നില.15 അംഗ ഭരണസമിതിയില് ആറുപേരെ സി.പി.എമ്മിന് വിജയിപ്പിക്കാനായതോടെ പാര്ട്ടി വലിയ ഒറ്റക്കക്ഷിയായി മാറുകയായിരുന്നു.
