തിരുവനന്തപുരം | കേരള കോണ്ഗ്രസ് ജോസ് കെ മാണി വിഭാഗം ബഹുജന പിന്തുണയുള്ള പാര്ട്ടിയാണെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. കേരള കോണ്ഗ്രസ് ഇല്ലാത്ത യുഡിഎഫ് കൂടുതല് ദുര്ബലമാകുമെന്നും കോടിയേരി പറഞ്ഞു. കേരള കോണ്ഗ്രസിലെ തര്ക്കങ്ങള് ഇടപെട്ട് പരിഹരിക്കുന്നതില് കോണ്ഗ്രസ് നേതൃത്വം പരാജയപ്പെട്ടുവെന്നും കോടിയേരി ദേശാഭിമാനിയിലെഴുതിയ ലേഖനത്തില് പറയുന്നു. പുന്നപ്ര – വയലാര് സമര നായകനായ പി കെ ചന്ദ്രാനന്ദനെ അനുസ്മരിച്ച് എഴുതിയ ലേഖനത്തിലാണ് കോടിയേരി ഇക്കാര്യം പറയുന്നത്.
കേന്ദ്രീകൃതമായ ഒരു നേതൃത്വം യുഡിഎഫിന് ഇല്ലാതെയായി. ഇതിന്റെ പ്രതിഫലനമാണ് ഇപ്പോഴത്തെ സംഭവം. യുഡിഎഫിന്റെ സംഘടനാപരമായും രാഷ്ട്രീയപരമായും കെട്ടുറപ്പ് തകര്ന്നു. ഇത് യുഡിഎഫിന്റെ തകര്ച്ചയ്ക്ക് വേഗത കൂട്ടും. രാഷ്ട്രീയരംഗത്തു വരുന്ന ഈ മാറ്റങ്ങള് എല്ഡിഎഫിനെ ശക്തിപ്പെടുത്തുമെന്ന് മനസ്സിലാക്കിക്കൊണ്ടാണ് ജമാ അത്തെ ഇസ്ലാമി, എസ്ഡിപിഐ എന്നിവരുമായി കൂട്ടുകൂടാന് കോണ്ഗ്രസ് നേതൃത്വം തീരുമാനിച്ചിട്ടുള്ളതെന്നും കോടിയേരി ലേഖനത്തില് പറയുന്നു