കൊച്ചി: മദ്യനിരോധിത മേഖലയായ ലക്ഷദ്വീപില് കോവിഡ് സാഹചര്യങ്ങളുടെ മറവില് മദ്യവും കഞ്ചാവും ഉള്പ്പെടെ ലഹരി വസ്തുക്കള് കടത്തുന്ന സംഘങ്ങള് സജീവമാകുന്നു. ആറുമാസത്തിനിടെ ലക്ഷദ്വീപ് പൊലീസ് വിവിധ ദ്വീപുകളിലായി പത്തിലധികം ലഹരിവേട്ടയാണ് നടത്തിയത്.
വാറ്റ് നിര്മാണസംഘങ്ങളും പല ദ്വീപിലും പിടിയിലായി. ഈ മാസം നാലിന് കവരത്തിലെത്തിയ എം.വി കവരത്തി കപ്പലിലെ രണ്ട് യാത്രക്കാരില്നിന്ന് 17 വിദേശ മദ്യക്കുപ്പികള് പിടികൂടിയിരുന്നു. അതേ കപ്പലില്നിന്ന് 23 വിദേശമദ്യ കുപ്പികളടങ്ങിയ വെള്ള ചാക്ക് ഉപേക്ഷിക്കപ്പെട്ട നിലയിലും കണ്ടെത്തി.
മറ്റ് പ്രതികള്ക്കായി തിരച്ചില് ഊര്ജിതമാക്കി. ലഹരികടത്ത് സംഘങ്ങളെ നിരീക്ഷിക്കാന് കൂടുതല് പൊലീസ് സ്ക്വാഡുകള് രൂപവത്കരിച്ചതായി കവരത്തി സ്റ്റേഷന് ഹൗസ് ഓഫിസര് എസ്.ഐ ഖലീല് പറഞ്ഞു. ലഹരികടത്തുമായി ബന്ധപ്പെട്ട് ഒരു വര്ഷത്തിനിടെ 15 ഓളം കേസുകള് കവരത്തി സ്റ്റേഷന് പരിധിയില് മാത്രം രജിസ്റ്റര് ചെയ്തു. എസ്.ഐ ഖലീലിെന്റ നേതൃത്വത്തില് റെയ്ഡുകളില് പങ്കെടുത്ത 12 അംഗ പൊലീസ് സംഘത്തെ ലക്ഷദ്വീപ് എസ്.പി അമിത് വര്മ സര്ട്ടിഫിക്കറ്റും പ്രശസ്തിപത്രവും നല്കി അനുമോദിച്ചു.
ദ്വീപുകളിലെ വിദ്യാര്ഥികള്ക്കിടയില് ലഹരി ഉപഭോഗം വര്ധിച്ച് വരുന്നതിനാല് പല ദ്വീപിലും ക്രമസമാധാന പ്രശ്നങ്ങള് ഉടലെടുക്കുന്നതായി റിപ്പോര്ട്ടുണ്ട്. ലക്ഷദ്വീപ് പൊലീസിെന്റ ലഹരിവിരുദ്ധ പോരാട്ടങ്ങള്ക്ക് ദ്വീപ് നിവാസികളുടെ പൂര്ണ പിന്തുണ ഉണ്ടാകുമെന്ന് ലക്ഷദ്വീപ് എം.പി മുഹമ്മദ് ഫൈസല്, കവരത്തി പഞ്ചായത്ത് ചെയര്മാന് ടി. അബ്ദുല് ഖാദര് എന്നിവര് പറഞ്ഞു.
