എലുരു: ആന്ധ്രായില് വീണ്ടും അജ്ഞാതരോഗം റിപ്പോര്ട്ട് ചെയ്തിരിക്കുന്നു. പടിഞ്ഞാറന് ഗോദാവരി ജില്ലയിലെ പുല്ലെ, കൊമിരെപള്ളി എന്നീ ഗ്രാമങ്ങളിലെ ജനങ്ങള്ക്കാണ് ഇപ്പോള് അജ്ഞാത രോഗം റിപ്പോര്ട്ട് ചെയ്തത്.
കഴിഞ്ഞ രണ്ട് മാസത്തിനിടെ ഇത് രണ്ടാം തവണയാണ് ആന്ധ്രായില് അജ്ഞാത രോഗം റിപ്പോര്ട്ട് ചെയ്യുന്നത്. നിന്ന നില്പ്പില് ആളുകള് കുഴഞ്ഞു വീഴുകയായിരുന്നു ഉണ്ടായത്. കുഴഞ്ഞു വീഴുന്നവരുടെ വായില് നിന്നും നുരയും പതയും വരുന്നു. അജ്ഞാത രോഗം സംശയിച്ച് ഇതുവരെ 22 പേരെ ആശുപത്രിയില് പ്രവേശിപ്പിച്ചു. അതില് ആറുപേര് രോഗമുക്തി നേടി ആശുപത്രിവിട്ടു.15 പേര് എലുരുവിലെ ആശുപത്രിയിലും ഒരാള് സമീപത്തെ പ്രാദേശിക ആശുപത്രിയിലും ചികിത്സയിലാണ് കഴിയുന്നത്.
ആരോഗ്യ വിദഗ്ധരോട് സന്ദര്ശനം നടത്താനും സ്ഥിതിഗതികള് വിലയിരുത്താനും മുഖ്യമന്ത്രി ജഗന് മോഹന് റെഡ്ഡി നിര്ദ്ദേശം നല്കി. കഴിഞ്ഞ ഡിസംബറിലും എലുരുവില് സമാനമായ സംഭവം റിപ്പോര്ട്ട് ചെയ്തിരുന്നു. ഭയപ്പെടേണ്ട സാഹചര്യമില്ലെന്നാണ് ആരോഗ്യവകുപ്പിന്റെ പ്രതികരണം.
