ന്യൂഡല്‍ഹി: മലിനീകരണത്തിന് കാരണമാകുന്ന പ്രവര്‍ത്തനങ്ങള്‍ സര്‍ക്കാറിെന്‍റ ശ്രദ്ധയില്‍പ്പെടുത്തുന്നതിനായി ’ഗ്രീന്‍ ഡല്‍ഹി’ മൊബൈല്‍ ആപ്ലിക്കേഷന്‍ പുറത്തിറക്കി ഡല്‍ഹി സര്‍ക്കാര്‍. സംസ്ഥാനത്തെ മലിനീകരണം കുറക്കുന്നതിന് എല്ലാവരുടെയും പിന്തുണ ആവശ്യമാണെന്നും ജനങ്ങളുടെ പിന്തുണ ഇല്ലാതെ സാധ്യമാകില്ലെന്നും ആപ് പുറത്തിറക്കി മുഖ്യമന്ത്രി അരവിന്ദ് കെജ്രിവാള്‍ പറഞ്ഞു.
മലീനീകരണത്തിന് കാരണമാകുന്ന ചിത്രങ്ങളോ വിഡിയോ എടുത്തശേഷം മൊബൈല്‍ ആപ്ലിക്കേഷനുകളില്‍ അപ്ലോഡ് ചെയ്യാം. ആപ്ലിക്കേഷന്‍ സ്ഥലം കണ്ടെത്തുകയും പരാതി സ്വമേധയാ ബന്ധപ്പെട്ട സ്ഥലത്തെ അധികാരികള്‍ക്ക് പോകുകയും ചെയ്യും. പരാതി തീര്‍പ്പാക്കുന്നത് സമയബന്ധിതമായി നടപ്പാക്കും. പരാതി പരിഗണിച്ച ശേഷം ബന്ധപ്പെട്ട അധികാരകള്‍ ചിത്രം പോസ്റ്റ് ചെയ്യുകയും വേണം. ഗൂഗ്ള്‍ പ്ലേ സ്റ്റോറില്‍നിന്ന് ആപ് ഡൗണ്‍ലോഡ് ചെയ്യാമെന്നും കെജ്രിവാള്‍ അറിയിച്ചു.
പരാതികളുടെ നിലവിലെ സ്ഥിതി നിരീക്ഷിക്കുന്നതിനായി ഡല്‍ഹി സെക്രട്ടറിയറ്റില്‍ ഗ്രീന്‍ വാര്‍ റൂം തയാറാക്കിയിട്ടുണ്ട്. 70ഒാളം ഗ്രീന്‍ മാര്‍ഷലുകള്‍ പ്രവര്‍ത്തനങ്ങളില്‍ പങ്കുചേരും -കെജ്രിവാള്‍ കൂട്ടിച്ചേര്‍ത്തു.
മുന്‍ വര്‍ഷങ്ങളെ അപേക്ഷിച്ച്‌ കനത്ത വായു മലിനീകരണത്തിലൂടെയാണ് ഡല്‍ഹി ഇപ്പോള്‍ കടന്നുപോകുന്നത്. വായുമലിനീകരണം രൂക്ഷമായതോടെ സര്‍ക്കാറിനെതിരെ പ്രതിഷേധവും രൂക്ഷമായിരുന്നു.
