തിരുവനന്തപുരം: ബാലഭാസ്‌കറിന്‍റെ കാര്‍ ഓടിച്ചിരുന്ന അര്‍ജ്ജുന്‍ കേരളത്തിലെത്തി. അസമിലായിരുന്നു അര്‍ജ്ജുനെന്ന് ക്രൈംബ്രാഞ്ച് നേരത്തെ വ്യക്തമാക്കിയിരുന്നു. കേസന്വേഷണം നടക്കുമ്പോള്‍ ഇത്രയും ദൂരം അര്‍ജ്ജുന്‍ പോയതില്‍ ദുരൂഹത നിഴലിച്ചിരുന്നു.
അര്‍ജുന്‍ കേരളത്തിലെത്തിയതായി ബന്ധുക്കളാണ് ക്രൈംബ്രാഞ്ചിനെ അറിയിച്ചത്. എന്നാല്‍, അര്‍ജ്ജുനെ ഉടന്‍ കസ്റ്റഡിയിലെടുക്കില്ല. ഫൊറന്‍സിക് പരിശോധന ഫലം ലഭിച്ചശേഷമേ അര്‍ജ്ജുനെ ചോദ്യം ചെയ്യുകയുള്ളൂ.
ബാലഭാസ്‌കറിന്‍റെ മരണവുമായി ബന്ധപ്പെട്ട കേസില്‍ മൂന്നു തവണ മൊഴിമാറ്റിയതോടെയാണ് അര്‍ജ്ജുന്‍ സംശയത്തിന്‍റെ നിഴലിലാകുന്നത്. ബാലഭാസ്‌കര്‍ സഞ്ചരിച്ച വാഹനം തിരുവനന്തപുരം ജില്ലയിലെ പള്ളിപ്പുറത്ത് പുലര്‍ച്ചെ 3 മണിക്ക് അപകടത്തില്‍പ്പെടുമ്പോള്‍ ഡ്രൈവര്‍ താനായിരുന്നുവെന്നാണ് ഇയാള്‍ പൊലീസിനോട് ആദ്യം പറഞ്ഞത്.
