തിരുവനന്തപുരം മേയര്‍ ആര്യ രാജേന്ദ്രനും ബാലുശ്ശേരി എം.എല്‍.എ സച്ചിന്‍ദേവിനും ഒരുമിച്ചുള്ള ജീവിതത്തിലെ ആദ്യ ഓണമാണ് വരാന്‍പോകുന്നത്.
സെപ്റ്റംബര്‍ നാലിന് ഇവരുടെ വിവാഹം. ഓണം രണ്ടു വീടുകളിലുമായി ആഘോഷിക്കാനാണ് തീരുമാനിച്ചതെന്ന് ഇരുവരും ഒരു അഭിമുഖത്തില്‍ പറഞ്ഞു.
തിരുവനന്തപുരത്തെ ഓണാഘോഷങ്ങള്‍ തനിക്ക് പരിചയമുള്ളതാണെന്ന് സച്ചിന്‍ ദേവ് പറയുന്നു. എസ്.എഫ്.ഐ സംസ്ഥാന സെക്രട്ടറിയായും ശേഷം എം.എല്‍.എയായും തിരുവനന്തപുരത്ത് ഉള്ളതിനാല്‍ ഇവിടുത്തെ ആഘോഷങ്ങളിലൊക്കെ ഒരുപാട് പങ്കെടുത്തിട്ടുണ്ട്. തിരുവനന്തപുരത്ത് അത്തം മുതല്‍ ഓണാഘോഷമാണ്. മലബാര്‍ മേഖലയിലും ആഘോഷത്തിന് കുറവൊന്നുമില്ല. എന്നാല്‍, ചില രീതികളില്‍ അല്‍പ്പം വ്യത്യാസമുണ്ടെന്ന് മാത്രം -സച്ചിന്‍ പറയുന്നു.
ആര്യ രാജേന്ദ്രന്‍ ആദ്യമായാണ് ഓണക്കാലത്ത് കോഴിക്കോടേക്ക് പോകുന്നത്. ഓണം സചിന്‍റെയും ആര്യയുടെയും വീടുകളിലായി ആഘോഷിക്കും. തിരുവനന്തപുരത്തെ തിരക്കുപിടിച്ച പരിപാടികളില്‍ നിന്ന് സമയം കണ്ടെത്തി വേണം ഓണം ആഘോഷിക്കാന്‍.
ആരാണ് ആദ്യം പ്രണയം പറഞ്ഞതെന്ന ചോദ്യത്തിന്, അത് ഇപ്പോള്‍ വ്യക്തമാക്കുന്നില്ലെന്നായിരുന്നു ചിരിയോടെ സച്ചിന്‍ദേവിന്‍റെ മറുപടി. രണ്ടുപേര്‍ക്കും സംഘടനാ പ്രവര്‍ത്തനത്തിന്‍റെ ഭാഗമായി ആദ്യമേ പരിചയമുണ്ടായിരുന്നു. ഒരു പ്രത്യേക സമയത്താണ് രണ്ടുപേരും പ്രണയം പറയുന്നത് -സചിന്‍ പറഞ്ഞു.
ആദ്യം ഇരുവീട്ടുകാരെയും അറിയിക്കാമെന്നാണ് സചിന്‍ പറഞ്ഞതെന്ന് ആര്യ പറഞ്ഞു. അങ്ങനെ ആദ്യം സച്ചിന്‍റെ വീട്ടില്‍ അറിയിക്കുകയും പിന്നീട് ആര്യയുടെ വീട്ടുകാരോട് കാര്യം അവതരിപ്പിക്കുകയുമായിരുന്നു. മുതിര്‍ന്നയാളുടെ പക്വതയോടെയാണ് സച്ചിന്‍ ഇക്കാര്യങ്ങള്‍ ചെയ്തതെന്നും ആര്യ പറയുന്നു.
വീട്ടില്‍ അറിയിച്ച ശേഷമാണ് യഥാര്‍ഥത്തില്‍ പ്രണയിച്ചു തുടങ്ങിയതെന്ന് സച്ചിന്‍ പറഞ്ഞു. അതുവരെ നല്ല ആഴത്തിലുള്ള സൗഹൃദമായിരുന്നു. എന്തും തുറന്നുപറയുന്ന സുഹൃത്തുക്കളായിരുന്നു. അതിന് ശേഷമാണ് പ്രണയത്തിന്‍റേതായ ചില പ്രത്യേകതകളിലേക്ക് മാറുന്നത്. വീട്ടുകാരോട് അവതരിപ്പിച്ച ശേഷമാണ് ഞങ്ങള്‍ കൂടുതല്‍ തിരക്കുകളിലേക്ക് വീണത്. ആര്യ മേയറായി. പിന്നീട് താന്‍ എം.എല്‍.എയായി. അധികം വൈകാതെ തന്നെ വിവാഹിതരാകാമെന്ന തീരുമാനത്തിലേക്ക് എത്തുകയായിരുന്നു -സച്ചിന്‍ പറഞ്ഞു.
സെപ്റ്റംബര്‍ നാലിന് രാവിലെ 11 മണിക്ക് തിരുവനന്തപുരം എ.കെ.ജി ഹാളില്‍ വെച്ചാണ് ആര്യ-സച്ചിന്‍ വിവാഹം.
