പയ്യന്നൂര്‍: നിര്‍ദിഷ്ട കെ റെയില്‍ പദ്ധതിക്കെതിരെ പയ്യന്നൂരില്‍ രൂപവത്കരിച്ച കെ റെയില്‍ പ്രതിരോധ സമിതിയുടെ നേതൃത്വത്തില്‍ സമരപരിപാടികള്‍ക്ക് രൂപംനല്‍കാന്‍ ബുധനാഴ്ച ജനകീയ കണ്‍വെന്‍ഷന്‍ നടക്കും.
രാവിലെ 10.30ന് പയ്യന്നൂര്‍ ഗാന്ധി പാര്‍ക്കില്‍ പ്രമുഖ സുപ്രീംകോടതി അഭിഭാഷകന്‍ അഡ്വ. പ്രശാന്ത്ഭൂഷണ്‍ ഉദ്ഘാടനം ചെയ്യും. കെ റെയില്‍ വിരുദ്ധ സമിതി സംസഥാന കണ്‍വീനര്‍ എസ്. രാജീവന്‍, ശാസ്ത്ര സാഹിത്യ പരിഷത്ത് മുന്‍ കേന്ദ്ര നിര്‍വാഹക സമിതി അംഗവും പരിസ്ഥിതി പ്രവര്‍ത്തകനുമായ വി.ടി. നാസര്‍, ഇ.എ.വി. നമ്ബൂതിരി (യുവകലാസാഹിതി), കെ.സി. ഉമേഷ്ബാബു, ഡോ. ഡി. സുരേന്ദ്രനാഥ്, കെ. രാമചന്ദ്രന്‍, അമ്ബലത്തറ കുഞ്ഞികൃഷ്ണന്‍ തുടങ്ങി പരിസ്ഥിതി, രാഷ്ട്രീയ, സാമൂഹിക, സാംസ്കാരിക മേഖലകളിലെ പ്രമുഖരും വിവിധ രാഷ്ട്രീയ- സാമൂഹിക സംഘടനാപ്രതിനിധികളും സംബന്ധിക്കും.
കെ റെയില്‍ പദ്ധതിക്കെതിരെ സമരപരിപാടികള്‍ കണ്‍വെന്‍ഷനില്‍ ആസൂത്രണം ചെയും. പ്രചാരണത്തിെന്‍റ ഭാഗമായി നടന്ന വാഹനജാഥ പയ്യന്നൂര്‍ ഗാന്ധി പാര്‍ക്കില്‍ ഗാന്ധിപ്രതിമക്ക് മുന്നില്‍നിന്ന് കെ റെയില്‍ പ്രതിരോധസമിതി ചെയര്‍മാന്‍ ടി.പി. പത്മനാഭന്‍ മാസ്റ്റര്‍ ഉദ്ഘാടനം ചെയ്തു. കണ്‍വീനര്‍ വി.കെ. രവീന്ദ്രന്‍ അധ്യക്ഷത വഹിച്ചു. എന്‍. സുബ്രഹ്മണ്യന്‍, അപ്പുക്കുട്ടന്‍ കാരയില്‍, വിനോദ്കുമാര്‍ രാമന്തളി, കെ. രാജീവ് കുമാര്‍, സരള എടവലത്ത്, കെ.സി. ഹരിദാസന്‍ എന്നിവര്‍ സംസാരിച്ചു. പ്രചാരണജാഥ പയ്യന്നൂര്‍, കുഞ്ഞിമംഗലം, രാമന്തളി, തൃക്കരിപ്പൂര്‍, പിലിക്കോട്, കരിവെള്ളൂര്‍ എന്നിവിടങ്ങളില്‍ പര്യടനം നടത്തി.
