ന്യൂഡല്ഹി: വിമര്ശനങ്ങള്ക്ക് താന് വലിയ പ്രാധാന്യം കൊടുക്കാറുണ്ടെന്ന് പ്രധാനമന്ത്രി നരേന്ദ്ര മോദി. അതെ സമയം ,ഗൗരവകരമായ വിമര്ശനം ഇപ്പോള് ഉണ്ടാവുന്നില്ലെന്നും മോദി പറഞ്ഞു. ഒരു മാസികക്ക് നല്കിയ അഭിമുഖത്തിലാണ് മോദിയുടെ പ്രതികരണം .
വിമര്ശനമെന്നത് ആരോപണങ്ങള് മാത്രമായി ചുരുങ്ങിയിരിക്കുന്നു. വിമര്ശനം ഉന്നയിക്കുന്നതിന് കഠിനാധ്വാനവും ഗവേഷണവും ആവശ്യമാണ് . ആളുകളെല്ലാം ആരോപണം മാത്രമാണ് ഉന്നയിക്കുന്നത്. വിമര്ശനം ഉന്നയിക്കാന് അവര്ക്ക് സമയമില്ലായിരിക്കാം. ഇത് മൂലം താന് വിമര്ശകരെ മിസ് ചെയ്യുകയാണെന്നും മോദി ചൂണ്ടിക്കാട്ടി .
തന്റെ ജോലികളെ കൃത്യമായി വിലയിരുത്തുന്നയാള്ക്ക് അതിനെ കുറിച്ച് ആക്ഷേപമുണ്ടാവില്ല. അധികാരത്തിന്റെ ലോകത്ത് നിന്ന് എപ്പോഴും മാറിനടക്കാനാണ് തനിക്ക് താല്പര്യം. ചിലര്ക്ക് പ്രധാനമന്ത്രിപദവും മുഖ്യമന്ത്രിപദവും വലിയ അധികാര കേന്ദ്രങ്ങളായിരിക്കും. എന്നാല്, തനിക്ക് അത് നന്മ ചെയ്യാനുള്ള വഴി മാത്രമാണെന്നും മോദി പറഞ്ഞു .
സാഹചര്യങ്ങളുടെ സമ്മര്ദം കൊണ്ടാണ് താന് രാഷ്ട്രീയത്തിലെത്തിയത്. ഗുജറാത്ത് മുഖ്യമന്ത്രിയായപ്പോള് കച്ചിലെ ഭൂകമ്ബ ദുരിതബാധിതര്ക്ക് സഹായമെത്തിക്കാനാണ് ആദ്യം ശ്രമിച്ചത്. അദ്ദേഹം പറഞ്ഞു . വാക്സിന് വിതരണത്തില് ഇന്ത്യ സ്വാശ്രയത്വം കൈവരിച്ചുവെന്നും പ്രധാനമന്ത്രി കൂട്ടിച്ചേര്ത്തു.
